Qileban, Wêranşar û Beyoglu de şayîyê ciwanan ameyî kerdene û şayîyan de azadîya Rayberê Şarê Kurdî Abdullah Ocalanî ameye waştene.

Şirnex

Qezaya Qilebanî ya Şirnexî de buroyê weçînayîşî yê DEM Partî de şayîye ameye kerdene. Wekîla DEM Partî Newroze Uysal, namzedê Şaredarîya Qilebanî yê DEM PArtî Alî Urek û Ferîde Ender tewrê şayîye bîyî.

Şayîye de Newroze Uysal qisey kerd û bale ante rol û mîsyonanê ciwanan ser. Newroze vat: ''Seke Birêz Abdullah Ocalanî vatbi ma bi ciwanan dest pêkerd û ma do bi ciwanan ser bikewê. Dewlete kena ke ciwanê ma kokanê xo ra dûrî bivisna coka polîtîkayanê şerê taybetî ana ca. Hetê bînî ra Birêz Ocalanî ra hîrê serrî yo xeberêke nêna girewtene. Ganî ciwanî vera nê sîyasetê tecrîdî vengê xo vejê û meydanan debikerê.''

Namzedan zî qiseykerdişê xo de pare kerd ke wa ciwanî 31ê adare de îradeyê xo bimojnê. 

Dima ciwanan bi slogananê sey “Bijî Serok Apo” û “Bijî berxwedana zindanan” govende girewte.

Riha

Qezaya Wêranşarî ya Riha de bi şîarê ''Wext wextê ciwanan o'' şayîye ameye kerdene. Namzedê Şaredarîya Wêranşarî yê DEM Partî Bedrîye Yorgun û Serhat Dîcle Înan û Wekîlê DEM Partî Omer Ocalan zî tewrê şayîye bîyî. Namzed Înanî îfade kerd ke ê do ciwanan reyde ameyoxî awan bikerê.

Wekîl Omer Ocalanî zî ard ziwan ke heta ke welat azad bibo ganî ciwanî têkoşîn bikerê, tecrîdê Îmraliyî bişiknê. Ocalanî venga pêro ciwanan da ke 31ê adare de wayîrê sindoqan vejîyê.

Îstanbul

Namzedê Şaredarîya Îstanbulî yê DEM Partî Merale Daniş Beştaş û Murat Çepnî qezaya Beyogluyî de tewrê şayîye bîyî.

Şayîye de Çepnîyî ciwanî selam kerdî û dîyar kerd ke ciwanî do bi enerjîya xo serkewtişanê pîlan bivisnê destî. Çepnîyî venga pêro ciwanan da ke 17ê adare de Newroza Îstanbulî de wa cewab bidê îqtîdarî.

Dima ciwanan govende girewte, serê adirî ra xo eşt û sloganê sey ''Bijî Serok Apo" û "Newroz pîroz be" vatî.