Xeylêk şaristananê Kurdîstanî de adirê Newroze ame tavistene û azadîya Rayberê Şarê Kurdî Abdullah Ocalanî ameye waştene.

Şirnex de dewa Hespîstî ya qezaya Hezexî de ciwanan bi slogananê ''Bijî Serok Apo'' adir vist ta. Ciwanan waştbi ke serê sibayî adir bivisnê ta la leşkeran nêverda. Coka ciwanan şan dewe de adir vist ta. Ciwanan fîşekî eştî û bi sloganan govende girewte.

Qers de taxa Aydinlikevlerî de adirê Newroze rixmê tacîzê wesayîtanê zirxînan û TOMAyan zî ame tavistene. Dima TOMA adir hewba kerd la şarî cayêkê bînî de adir vist ta. Qezaya Dîgorî de zî adirê Newroze dewa Tirmaşînî de ame tavistene û dormeyê adirî de govende ameye girewtene.

Anqara de Mamak de rayraşîyayîşêk ame kerdene û dima adirê Newroze Anitparke de ame tavistene. 

Adana de cinî û ciwanan qezayanê Yuregîr û Seyhanî de adirê Newroze bi sloganan vist ta. Şarî dormeyê adirî de govende girewte. Wekîlê DEM Partî Alî Bozan namzedanê şaredarîyan ê DEM Partî reyde tewrê şayîyan bi. Yuregîr de ciwanan rayraşîyayîşêk zî kerd û sloganê sey "Bijî Serok Apo", "Jin, Jiyan, Azadî" û "Newroz pîroz be" vatî.