Ciwanê ke Pirsûs de ameyî qetilkerdene, serrgêra şehadetê înan de ameyî vîrardene. Aktîvîteyanê vîrardişî ame vatene înanê ke vatêne ''Kobanê kewt, do bikewo'' qetilkar ê yê û mesajê hesabpersayîşî dîyayî.
Ciwanê ke Pirsûs de ameyî qetilkerdene, serrgêra şehadetê înan de ameyî vîrardene
Îstanbul
Îstanbul de şaro ke verê Cemxaneyê Gazî de ame pêser ver bi Goristanê Gazî pê pankartan û sloganan rayra şi. Vîrardişo ke Wekîla HDPyî Dersim Dag û xeylêk kesî tewrê ci bîyî bi rêzgirewtişî dest pêkerd.
Endamê Heyetê Rayberdişê Merkezî yê SDGFyî Hîvda Selena ke vîrardiş de qisey kerd vîsvîre ke ciwananê ke waştêne paştî bidê şarê Kobanê bîlasebeb ameyî qetilkerdene û vat: ''Ma waşt ke paştî bidê Kobanê û pîya înşa bikerê. Dewleta qetilkare waşt Şorişê Rojawanî bexçeyê Amara de defin bikero. Qetilkarê Pirsûsî qetilkarê Denîze Poyraz ê. Înanê ke vizêr Qirkerdişê Sêwasî kerd, berpirsîyarê Qirkerdişê Anqara Garî yê. Ma do nê kuçeyan de hesabê ci bipersê.''
Merdimanê şehîdan de zî dej û hêrsê xo ard ziwan û vat ê do cigêrayîşê edaletî rê dewam bikerê.
Dersime Dage zî vist vîrî ke înanê ke vatêne ''Kobanê kewt, do bikewo'' qetilkar ê yê û vat: ''Sozê ma şehîdanê rê oyo ke ma do Rojawanî bipawê û xeyalanê înan nîmcet nêverdê. Ma do Rojawan, Vakur û Başûr de şoriş bikerê û xeyalanê şehîdan bîyarê ca.''
Amed
Veysel Ozdemîro ke qirkerdiş de cuya xo vînî kerde, Goristanê Yenîkoyî yê Amedî ame vîrardene. Merdimê Aydemîrî û wekîlê HDPyî Remzîye Tosun, Semra Guzel îdarekar û endamê MEBYA-DERî,TUHAY-DER, TİPî tewrê vîrardişî bîyî. Ozdemîro ke eynî wextî de roja rojbîyayîşê ci bî serê gorê ci de pasta ameye birnayene. Waya Ozdemîrî Rabîa Ozdemîr şîîra ke birayê xo rê nuşte, wende.Qiseykerdişan de ame vatene ke xeyalê nê ciwanan pîyaciwîyayîşê şaran bi û no xeyal Rojawan de ame caardene.
Dêrsim
Ciwanan ra Çagdaş Aydin zî dewa Gunekonakî yê Pulurî ya Dêrsimî de gorê xo ser ame vîrardene. Merdimê Aydinî û Welîlê HDPyî yê Dêrsimî Alîcan Onlu temsîlkarê partîye yê bajar û qeza tewrê vîrardişî bîyî. Vîrardiş qirkerdiş ame şermezarkerdene û sozê caardişê waştişanê ciwanan ame dayene.
Şirnêx
Ugur Ozkan zî Goristanê Asrî yê qezaya Cizîre ya Şirnexî de ame vîrardene. Merdimê Ozkanî, Wekîla HDPyî ya Şirnexî Nurane Îmîr, Maye Haştîye û xeylêk kesî tewrê vîrardişî bîyî. Nurane Îmîra ke tîya qisey kerd vîst vîrî ke ciwanan têna waştêne domananê Kobanê rê dîyarî bêrê û dejê înan kêm bikerî ala rîyê nayî ra hetê zîhnîyetê DAÎŞî ra ameyî qetilkerdene û vat: ''Qetilkarê ke eşkera yê yenê pawitene û nimetene.''
