Anqara de 10ê teşrîna verêne ya 2015î de cerganê DAÎŞî bi hemkarîya îqtîdarî Meydanê Garî de 103 merdimî qetil kerdî. Qurbanê Qirkerdişê Garî yê Anqara Amed, Îstanbul, Îzmîr û Manîsa de serê goranê xo de ameyî yadkerdene.

Amed

Rayberîya Platformê Demokrasî û Kede yê Amedî de taxa Ofîsî ya qezaya Yenîşehîrî ya Amedî de merasîmê yadkerdişî ame kerdene. Merasîm de TMMOByî ra Dogan Hatunî qisey kerd û îfade kerd ke wexê qirkerdişî de tedbîrê qîmî nêameybî girewtene. Hemvervatoxa Platformî Gonule Adibellî zî da zanayene ke hêzanê tarîyan no qirkerdiş kerd.

Qiseykerdişan ra dima balonê sipîyî ameyî pernayene.

Îstanbul

Îstanbul de xeylêk goristanan de qurbanê Qirkerdişê Garî ameyî yadkerdene. Îdarekar û endamê HDPyî û hemwelatîyî zî tewrê merasîman bîyî.  Endamê MYKyê HDPyî Ferhat Encuyî merasimê Serdar Benî de qisey kerd û ard ziwan ke berpirsîyarê qirkerdişî AKP bi xo yo.

ÎHD

Komeleya Heqanê Merdiman (ÎHD) derheqê Qirkerdişê Garî de kombîyayîşê çapemenîye kerd. Îdarekarê HDPyî zî tewrê kombîyayîşî bîyî. Sekretera Şubeyê ÎHDyî yê Îstanbulî kombîyayîş de qisey kerd û vat ke verê qirkerdişî qestî ra nêame girewtene û ganî berpirsîyarê qirkerdişî bêrê hukmkerdene.

Îzmîr

Hêzanê Demokrasî û Kede yê Îzmîrî zî verê Merkezê Kulturî yê Turkan Saylanî de eşkerayîyêke daye. Hemserekê HDPyî yê Îzmîrî Kadîr Baydur û Sereka EMEPî Selam Gurkan zî tede xeylêk temsîlkarê partî û rêxistinan tewrê eşkerayîye bîyî. Hemsereka KESKî ya Îzmîrî Aysune Gezen eşkerayîye de pare kerd ke eke cinî, kedkarî û her kes yew bibê eşkenê vera îqtîdarî têkoşîn bikerê. Eşkerayîye ra dima seba vîrameyîşê qurbanana 103 qeranfîlî nîyaye meydanê Gundoganî ro.

Manîsa

Manîsa de zî merasîmê yadkerdişî de Serekê Egitim-Senî yê Manîsa Îsmaîl Şenerî vat: ''Ma do bi haştî û demokrasî welatê xo tacîdar bikerê û nê welatî dîyarîya 103 qeranfîlan bikerê.''