Emîne Şenyaşara ke mêrde û di lajê ci hetê merdimanê Wekîlê AKPyî Îbrahîm Halîl Yildizî ra kişîyayî lajê xo Ferît Şenyaşarî reyde verê Edlîyeya Riha de nobeta edaletî kena. Şenyaşarî roja 246. a çalakîya xo de keyeyê xo de nobeta xo rê dewam kenê.

Keyeyê Şenyaşarî wazeno ke cezaya qîme bêra dayene kiştoxan û birayê ci Fadil Şenyaşar wa bêro veradayene. Ferît Şenyaşarî derheqê babete de ANFyî rê qisey kerd.

Şenyaşarî da zanayene ke nêweşxaneyê dewlete de birayê ci û babîyê ci kişîyayî û vat: ''Ganî dozger derheqê qirkerdişê nêweşxaneyî de dosyayêke abikera. Dozgerî têna serebûtê dikane ser o dosya akerde û pê tedaya sîyasî cezayêka girane daye birayê mi. 3 serrî yo qirkerdişê nêweşxaneyî ser o gamêke nêerzîyaye. Semedo ke mîyanê nê qirkerdişî de wekîlêk esto dozgerî bi çêrî tênêgêrenê.

Ma semedê edaletî çalakîya roniştişî daye destpêkerdene. Ma semedê edaletî têkoşîn kenê. Heta nika ma 5 reyî ameyî destbendkerdene, 2 reyî polîsan da ma ro. Tewr peyên pê birêka skandale ma ameyî destbendkerdene. Mudirê Asayîşî yê Riha bêbira dozgerî ma destbend kerî. Wexto avûkatanê ma dozgerî rê vat eşkera bi ke hayîya ci pê ney çin a.''

Ferît Şenyaşarî ard ziwan ke têkoşînê înan do dewam bikero û vat: ''Kesê ke merdimê ma kiştê wazenê ma keyeyê xo de ronişê. Dadîya xo reyde ma do têkoşînê xo rê dewam bikerê. Çend ma destbend bikerê, bitepişê, ceza bidê ma zî ma têkoşînê xo rê dewam bikerê. Nika derheqê ma de bi bahaneya ke 'karmendî rê heqaret kerdo' dewa ameya akerdene û cezaya zîndanî ya 4 serran yena waştene. Pêro dinya na bêedaletîye seyr kena. Wezîrê Edaletî qala edaletî keno zulmê vera ma nêvîneno.''