Xoverdayîşê Keyeyê Şenyaşarî û ci rê zîyaretê paştdayîşî dewam kenê. Ewro zî Mêrdin, Şirnex, Wan, Colemêrg, Amed, Êlih û Îstanbulî ra bi desan cinîyan Emîne Şenyaşar zîyaret kerd.

Dayîkê Haştîye û merdimanê tepişteyan hema ke nêrasayî verê edlîye polîsan verê înan girewt û destûr nêda ke ravêrî. Polîsan cinîyî girewtî binê ablûqa. Avûkatan naye ser waşt polîsî sebebê vergirewtişî bi nuşte ramojê la polîsan no red kerd. Dima ra Keyeyê Şanyaşarî warê nobete ra ver bi cinîyan kewt rayîr. Heyetî Emîne Şenyaşar bi çapikan verwazî kerd. Dayîke Şenyaşar vat şima Edîlê mi, Celalê mi erd û verê barîkatê polîsan de xora şîye. Dayîkanê Haştîye vat ê semedê paştdayîşê xoverdayîşî ameyî û aye ra waşt ke wa mebermo înan şay mekero. Emene Şenyaşar vera neheqîye hersê xo ard ziwan û vat wa hinî no îqtîdaro zulmkar şiro edalet bêro.

Heyetî dima ra binê ablûqaya polîsan de eşkerayîye daye. Ferît Şenyaşarî ke tîya qisey kerd nê vatî: ''Dayîka ke zerrîya ci vêşena 8 mengî yo tîya nobete tepişena. Eke huqûq esto wa qetilkarê keyeyê ma bêrê cezakerdene. Na bêhuqûqîye cade bêro qedînayene.''

Meclîsê Dayîkanê Haştîye yê Wanî ra Zekîye Kaya zî vat: ''Ma pêro paştî danê dayîke. Ganî her kes wayîrê dayîke vejîyo. Eke no welatê ma pêrun o ganî edalet zî pêrone rê bibo. Wa semedê caardişê edaletî game bêro eştene. Waştîşê dayîke waştişê ma yo.Wa biciwîyo xoverdayîşê Emîne Şenyaşar.''

Meclîsê Dayîkanê Haştîye yê Geverî ra Fazîle Polat zî vatişê cenet binê linganê dayîkan de yo vist vîrî û vat: ''Ma zî dayîk ê. Bi seyan kesî bîlasebeb tepişteyê. Lajê dayîke zî tepişteyo. Ganî her kes wayîrê dayîke vejîyo ke na neheqîye bîqedîyo.''