Şingal û Mexmûr de bi beşdarîya hemwelatîyan 21ê Sibate Roja Ziwanê Dayîke ya Dinya ameye fîrazkerdene.

Şingal

Şingal de rayberîya Komelê Demokratîkî yê Êzidxanî (SPCDÊ) de Roja Ziwanê Dayîke ya Dinya bi eşkerayîyêke ameye fîrazkerdene.

Eşkerayîye hetê mamosta Vîyane Bedel ra ameye wendene. Vîyane qala girîngîya ziwanî kerde, roja her kesî fîraz kerde û wina venga pêro merdim û roşnvîran da: ''Ganî ma kurdkî her ca de bidê şinasnayene û ganîkerdene. Ma roja ziwanê dayîke ya pêro êzidîyan fîraz kenê.''

Mexmûr

Dibistana Amedeyî ya Şehîde Koçerîne ya Kampa Multecîyan a  Şehîd Rûstem Cûdîyî ya Mexmûrî de Warê Perwerdeyî yê Mexmûrî zî bi eşkerayîyêke Roja Ziwanê Dayîke ya Dinya fîraz kerde.

Eşkerayîye de ame parekerdene ke dewleta qirkere xîret kena ke kurdkî qir bikera la şarê kurdî ziwan û nasnameyê xo pawenê. Eşkerayîye wina dewam kerd: ''Xîretanê îşxalkeran ra kurdkî ewro binê tehlukeyî de ya. Eke ma ewro bi ziwanê xo qisey nêkerê siba domanê ma do nêeşkê nê ziwanî bişuxilnê.''