Rayberê Şarê Kurdî Abdullah Ocalanî roja pancşemeyî (vizêr) pê telefonî birayê xo Mehmet Ocalanî reyde qisey kerd. Pêvînayîş xeylêk xîret û çalakîyanê kurdan ra dima qewimîyaye. Wextêkî verî medyaya komelkî ser o derheqê weşîya Rayberê Şarê Kurdî de tay îdîayî weşanîyayî. Nê îdîayan kurdî qerqilnayî û startê çalakîyan zî da.

Pêvînayîşê telefonî roja pancşemeyî binê çimdarîya Serdozgerîya Komare ya Riha de ame kerdene la zaf kilm bi. Pêvînayîş birîuya. Buroyê Huqûqî yê Asrinî derheqê pêvînayîşî de vatbi: ''Serdozgerîye ra veng dîya keyeyanê muwekîlanê ma birêz Abdullah Ocalan, birêz Omer Hayrî Konar, birêz Hamîlî Yildirim û bizêr Veysî Aktîşî ke wa heqê xo yê telefonî bişuxulnê. Hela birayê birêz Ocalanî qisey kerdêne pêvînayîş birîya û dewamê pêvînayîşî nêame kerdene. Pêvînayîşê Hamîlî Yildirimî zî zaf kilm bi. Omer Hayrî Konar û Veysî Aktaş zî semedê protestokerdişê tecrîdî pêvînayîş qebul nêkerd.''

Mehmet Ocalanî derheqê pêvînayîşî de Ajansê Mezopotamya rê qisey kerd. Goreyê vateyanê ci 24ê adare de saete 18.00 de Mudirê Zîndanê Îmraliyî tira telefon kerd û vat ke ganî Mehmet Ocalan 25ê adare saete 13.45 de şoro Serdozgerîya Komare ya Riha û abdullah Ocalanî reyde pê telefonî qisey bikero.

Mehmet Ocalanî pare kerd ke roja bîne o şîyo serdozgerîye û qata cêre de înan o teyna girewt zereyê odayêke. Mehmet Ocalanî ard ziwan ke oda de wezîfedarêk estbî  û wexto ke telefon cêna Mehmet Ocalanî telefon berz kerd. O çax Rayberê Şarê Kurdî birayê xo rê vato: ''Ti senî ameyî tîya? Kamî ti ardo? Senî bi? Ti ça ra telefon kenî?''

Abdullah Ocalan: Dewlete kayêkê tehlukeyînî kay kena

Mehmet Ocalanî vat: ''Kekê mi vat 'Nê kerdişê to zî dewlete zî raşt nîyo. Serrêke ra nata pêvînayîşêk çin o. Nê kerdişî nê huqûqê na dewlete de ne zî huqûqê dewletêka bîne de estê. Ameyîşê to zaf tehlukeyîn û xelet o. Dewlete zî zaf tehlukeyîn a. No raşt nîyo. Eke no pêvînayîş bêro kerdene ganî çarçewa huqûqî de bêro kerdene. Nêbeno ke serrêke ra dima ma pê telefonî pêvînayîş bikerê.' Serek vera wina vatêne 'Şima xeletî kenê. Dewlete zî xeletî kena şima zî. No huqûqî nîyo, raşt zî nîyo. No qetî nêno qebulkerdene û zaf tehlukeyîn o. Ez wazena wa avûkatê mi bêrê tîya û ma pêvînayîş bikerê. No çîyo huqûqî yo. 22 serrî yo ez tîya de ya. Na mesele ameyox de do senî biba? Ancax pê huqûqî na mesele çareser bena. Çira avûkatî nênê? Eke pêvînayîşêk do bêro kerdene wa avûkatan reyde b,bo. Çunke na rewşe hem sîyasî hem zî huqûqî ya.''

'No pêvînayîş xelet o, no yew pêvînayîş nîyo'

Mehmet Ocalanî pare kerd ke ey vato semedê pêvînayîşî grevê vêşanîye yê tepişteyan o û o çax zî Rayberê Şarê Kurdî Abdullah Ocalanî wina vato: ''Ez nêwazena semedê mi ra çew zîndanan de bimiro. Mi verî zî wina vat ez nika zî wina vana. No çîyêko giran o. Ganî şima naye ser o bifikirê.''

Mehmet Ocalanî vat: ''Mi kekê xo reyde 4-5 deqa qisey kerd. Veng vengêko barî bi. Ez vana qey vengê Serekî bi. Dima ke Serekî mi ra vat 'No pêvînayîş xelet o, no pêvînayîş nîyo' telefon birîya. Mi selahîyetdaran rê rewşe vat. Înan zî vat ke wa ez pabeyê înan vindera. Dima telefonêko bîn ame. Kesêko bîn gêra mi. Ey mi rê vat ke ganî ez uca de vindera û uca (serdozgerîye) tern nêkera. 10-5 deqayan ra dima mi vat ke telefon do nêro. Dima înan mi rê vat 'Pêvînayîş qedîya'. ''

Mehmet Ocalanî venga dewlete û wayîranê wijdanî da ke nê kerdişî qetî nênê qebulkerdene û vat: ''Zîndanan de heqê demokratîk û meşrûyî yê merdiman estê. Goreyê qanûnanê Tirkîya ganî ma her 15 rojan de yew bieşkê ey bivînê.Ma telefon de têna 4-5 deqayan qisey kerd. No antîdemokratîk o. Ma venga CPT, Konseya Ewropa, pawitoxanê heqanê merdiman, roşnvîr û demokratan danê ke wa cade meseleya ma çareser bikerê. No nêno qebulkerdene. Eke ma zî hemwelatîyê na dewlet ê wa heqanê ma bida ma.

Ê kesê ke Serek teslîmê Tirkîya kerd, mesuldarîyê înan zî estê. Ma venga înan zî danê ke wa cade pêvînayîşê keye û avûkatan bêro kerdene. Dewlete 22 serrî yo Serek zîndan de tepişnena. Pêvînayîşê pê 4-5 deqayan nêbeno. Serek mabênê şaran de pird o. Heqê çewî çin o ke nê pirdî birijno.''