Abdullah Ocalanî badê 43 mengan birarzayê ci wekîlê DEM Partî Omer Ocalanî reyde pêvînayîş kerd û reyna mesajê o eşkeno mesele çareser bikero da. Huqûqnas Ercan Kanarî derheqê babetê de ANFyî rê qisey kerd û nê vatî:

''Bahçeleyî tecrîdê Îmraliyî qebul kerd û Serekkomar Recep Tayyip Erdoganî zî paştî daye ey. Yanî hukmatê ke di hewtê verî cewab da persena Komîteya Parlamenteran a Konseya Ewropa û vat tecrîd çîn o, tecrîd qebul kerd. Bahçeli veng dano ke wa bi şertî tecrîd bêro wedaritene la xora goreyê qanûnan ganî tecrîd bêro wedaritene. Tecrîdê serê Ocalanî goreyê şertanê Mandela nîyo. 2015 de Şertê Standart ê Asgarî yê tepişteyan ê Netewayanê Yewbîyayeyan sey Şertanê Mandala ameyî namekerdene. Seba ke Mandelayî zîndan de vera tecrîdî têkoşîn kerd nameyê ey dîya ci.

Goreyê Komîteya Parlamenteran a Konseya Ewropa 8 ya zî 14 serran rayêke û Gorayê Mehkemeya Heqanê Merdiman a Ewropa (MHME) 25 serran de rayêke ceza ganî newera bêra destgirewtene. Hetê nê wird dezgehan ra zî Tirkîya ameye hîşyarkerdene ke wa heqê hêvî bêro caardene. MHME canêardişê heqê hêvî sey îşkenceyî name kena. Tirkîya ganî helêke cuwaver heqê hêvî bîyarê ca.

Cezaya îdamî ya girane 30 serrî ya la bado ke na ceza dîyaye Abdullah Ocalanî no ame bedilnayene û na ceza bîye heta mergî. Nika têna Ocalan nê tewr tay nizdê 10 kesan bi cezaya heta mergî ameyî mehkumkerdene. Coka ganî cezaya girane ya meubetî bi temamî bêra wedaritene. Prosesê tecrîdî yê Abdullah Ocalanî û Nelson Mandela sey yewbînî yê. Ganî sey Nelson Mandala şertê îkametî yê ke hewce kenê bêrê caardene û Abdullah Ocalan serbest bêro veradayene.''