Tepişteyanê dewaya PKK û PAJKî 27ê teşrîna peyêne ya 2020î ra nata vera tecrîdkerdişê Rayberê Şarê Kurdî Abdullah Ocalanî û binpaykerdişê heqanê xo grevê vêşanîye de yê. Komîsyonê Teqîbkerdişê Grevê Vêşanîye yê ÎHDyî ra Mehmet Acettîn grevê vêşanîye ANFyî rê ercna.

Acettînî vist vîrî ke rixmê muaracatanê avûkatanê Buroyê Asrinî hema zî seba pêvînayîşanê bi Abdullah Ocalanî hukmatî gamêka pozîtîfe nêeşte. Acettînî vat: ''Dewlete wexto ke grevê vêşanîye wextderg nêbo û kesêk nêmireo muxatab nêbena. Coka ganî rayaumûmîye wayîrê çalakîya grevê vêşanîye vejîya. Na babete de bêvengîye esta.''

Acettînî îfade kerd ke waştişê tepişteyan meşrû yê û dewlete qanûnanê xo binpay kena. Acettînî vat: ''Tecrîdê Îmraliyî şexsê Birêz Ocalanî de yeno kerdene la nika no tecrîd pêro zîndanan de vila bîyo. Tecrîd meseleyêka giran û têna pê grevê vêşanîye çareser nêbeno. Pê paştdayîşê komelkî tecrîd eşkîyeno bêro wedaritene. ma seba ney gama verêne eşte. Ma do Îstanbul de koordînasyonê teqîbkerdişê grevê vêşanîye ronê û dima zî vera tecrîdî dest pê xebate bikerê.''