Waya Hamdusena Ada ya ke grevê vêşanîye de ya, Rehaşate Ada ANFyî rê qisey kerd.

Ada ard ziwan ke aye verê destpêkerdişê grevê vêşanîye waya xo zîndan de zîyaret kerd û vat, ''Gama ke ma şîyî zîyaretê aye, vat ê do semedê şiknayîşê tecrîdê serê Rayber Apoyî dest pê grevê vêşanîye bikerê. Moralê înan ca de bi û xoverdayîşî rê dewam kerdêne. Semedê ciwîyayîşî û bidê ciwîyayene xover danê. Ganî her kes paştî bido nê xoverdayîşî. Heta wedaritişê tecrîdî, domanê ma zîndanan de, ma zî do çar parçeyanê Kurdîstanî de xover bidê.  Wa her kes paştî bido xoverdayîşê zîndanan.''

 Reşahate Ada vist vîrî ke înan verî zî seba ke bale biancê rewşa tepişteyanê nêweşan û binpaykerdişê heqan ser 14 aşmî Nobeta Edaletî tepişte û wina vat: ''Domananê ma semedê şar û nasnameyê xo têkoşîn kerd. Çîyêko xirab nêkerd. Domananê ma semedê na herre ganê xo feda kerd. Domanê ma zîndanan de îşkence vînenî. Ma hinî nê nêwazenê. Ma paştî danê têkoşînê heqdarî yê domananê xo. Wa hinî peynîya tedrîd û îşkenceyî bêro.''

Hamdusena Adaya ke Zîndanê Amedî de grevê vêşanîye de ya 2011 de qezaya Licê ya Amedî de ameyî destbendkerdene û bi îdîaya ''Endamîya rêxistine'' ameye tepiştene. Dima ra sewqê Zîdanê Rize bîye û badê cehdkerdişanê dergan reyna sewqê Zîndanê Amedî bîyî.