14ê nîsana 2022yî ra nata dewleta tirke ya îşxalkere Zap, Metîna û Avaşîn de vera gerîlayan her tewirê çekanê kîmyewîyan, bombaya nuklere û gazê qedexekerdeyî şuxilnena. Sere Rêxistina Qedexekerdişê Çekanê Kîmyewîyan (OPCW) waro mîyanneteweyî vera dewleta tirke bêveng o.

Endamê Kongreya Neteweyîye ya Kurdîstanî (KNK) Adem Uzunî derheqê babete de ANFyî rê qisey kerd.

Uzunî vist vîrî ke goreyê serra vîyarte 2022 de dewleta tirke şuxilnayîşê çeka kîmyewîye zaf zêdînayo û vat: ''Çapemenîya mîyanneteweyîye xeylêk reyî babete viste rojdem la heyf ke enstîtuyê ke ganî cigêrayîşî bikerê erkê xo nêanê ca. Keyeyanê gerîlayanê ke pê çeka kîmyewîye şehîd bîyê, bi desan mektubî şawitî dezgehanê erkdaran, dewletan û dezgehan. Cewab nêdîyeno nê mektubam. Têna Almanya vat 'Hayîya ma pê îdîayan est a. La OPCWyî delîlêk nêvisto destî.' Brîtanya zî heman çi vato.

OPCWyî delîlê tay kesan û dezgehanê xoseran qebul nêkerdê. Done û parçeyê ke herême ra ameyê nêameyê qebulkerdene. Komê xebate û komîsyonî zî seba cigêrayîşî nêerşawîyenê herême. Seba ke OPCW herême de cigêrayîşan bikero asta dewlete de waştiş ganî bêro kerdene. Îdîayê xeylêk cidîyî est ê, dîmenî est ê, çalakîyê protestoyî est ê. La OPCW tênêgêreno. No hem manîpulkerdişê rayaumûmîye hem zî nêşinasnayîşê qanûn û krîteran o. OPCW de temsîlkarê 193 dewletan est ê. Nê dewletî û OPCW tênêgêrenê. Yanî ê krîteranê xo binpay kenê.''

Adem Uzunî bale ante raporanê serê hêrişanê kîmyewîyan ser û vat: ''Tirkîya sey endamêka NATOyî nêeşkena çekanê qedexekerdeyan bişuxilna. Çekê ke Tirkîya vera herême şuxilnena, sey bombayanê Nagasakî û Hîroşîma tesîr kenê. Rixmê hendeyê delîl û îsbatan zî qet yew endamêkê NATOyî vera hêrişanê kîmyewîyan ê dewleta tire nêrazîbîyayîşê xo nêmojneno. No zî stratejîya NATOyî ya. NATO sûcanê şerî yê endamanê xo paweno, wexto ke endamêkê ci çekanê kîmyewîyan şuxilneno û qanûnan binpay keno zî NATO endamê xo paweno.''