Namzedê Şaredarîya Mêrdînî yê DEM Partî Ahmet Turkî qezayanê Qoser û Artukluyî de xebatê weçînayîşî kerdî. 

Qoser de şarî eleqeyêko pîl mojna Turkî. Wekîlê Mêrdînî Kamuran Tanhan zî tewrê xebatan bi. Ahmet Turkî tîya de xîtabê şarî kerd û vat: ''Ma armanc kenê ke nê erdî de haştîye bîyarê ca. Eke îradeyê ma sindoqan de vejîyo ver ma do seba haştîye gamêke bierzê. Ma wazenê erdê xo ser de bi ziwan, kultur û nasnameyê xo biciwîyê.

Di dewrî yo qeyûmî tayînê şaredarîyanê ma yenê kerdene. Şarê ma ney ra razi nîyo. Ma do 31ê adare de şorê sindoqan ser û şaristananê xo îdare bikerê. Ma heta peynî sindoqan bipawê.''