Vera destbendkerdişê hemşaredaranê Akdenîzî nêrazîbîyayîşî dewam kenê. Şarî vizêr zî heta şanî dormeyê şaredarîya ablûqakerde de çalakîyanê xo rê dewam kerd.

Taxanê Çîlekî û Guneşî yê Akdenîzî de bi hezaran kesan vera destsernayîşî rayraşîyayîş kerd û înan vat ke ewro verê edlîye de kom bibê. 

Wekîlê DEM Partî, xeylê hemşaredarî, endamê Meclîsê Mayanê Haştîye û xeylê kesî tewrê rayraşîyayîşî bîyî. 

Rayraşîyayîş de Hetkarê Hemserekanê DEM Partî Mehmet Ruştu Tîryakîyî vat: ''Heta ke embazê ma vera bidîyê xoverdayîşê ma do dewam bikero. Siba wa her kes verê edlîye de bibo.''

Wekîla Mersînî Perîhane Koca vat: ''Ma do na bêhuqûqîye qebul nêkerê. Ma do her ca de wayîrê îradeyê xo vejîyê. Ma do şaredarîyanê xo bipawê.''

Wekîl Huseyîn Olanî zî venga her kesî da ke ewro verê edlîye de bibo. Dima Olanî û Mayanê Haştîye merşê 'Hernê Pêş' vat. 

Rayraşîyayîş bi sloganan qedîya.