Bajarê Kolnî yê Almanya de semedê paştdayîşê Can TVyî ke xîtabê komelê elewîyan keno, aktîvîteyêke ameye organîzekerdene. Hemsereka Pêroyî ya DBPyî Çîgdeme Kiliçgun Uçar, Wekîlê DEM Partî yê Îstanbulî Pir Celal Firat, temsîlkarê dezgehanê elewîyan, sîyasetmadarî û xeylê kesî tewrê ci bîyî.

Aktîvîte bi dûaya gulbangî ya Pir Celal Firatî ame akerdene. Firatî derheqê qewimîyayîşanê aktuelan de qisey kerd û vat: ''Nê demî de bitaybetî Sûrîye de vera elewîyan tehdîdê qirkerdişî est o. Çeteyê ke Sûrîye de hêrişê elewîyan kenê peyê înan de zî Tirkîya est a.

Tirkîya de zî dişmenîya vera elewîyan çend şino girdêr bena. Îbadetxaneyê ma zirar vînenî, erjê ma yenê hedefgirewtene. Rojawan de şarê ma raştê hêrişî yeno. Ganî ma vera nê hêrişan dahîna zaf têkoşîn bikerê. Çi heyf ke Tirkîya de medya bîya bêveng. Coka ganî ma medyaya xo xurtêr bikerê û wayîrê erjanê xo bivejê.''

Dima ra koma muzîkî Zaza Women vejîyaye sehne û klamê kirmanckî vatî. Vervatoxa Yewîya Cinîyan ê Elewîyanê Demokratîkan Songule Morsumbul zî qiseykerdişê xo de Şehîdê Çapemenîya Azade yad kerdî û vat: ''Tirkîya de elewîyî her hetî ra raştê hêrişan yenê. Ganî ma her ca de vera hêrişanê serê elewîyan vengê xo berz bikerê.''

Badê goştarîkerdişê deyîranê hunermend Evrîm Alîyî Hemsereka Pêroyî ya DBPyî Çîgdeme Kiliçgun Uçar qisey kerd. Çîgdeme Kiliçgun Uçar ard ziwan ke aye Kurdîstanî ra selamî ardî û vat, ''Ewro serrgêra xelisnayîşê Kobanê ya. Cinîyan ke serkêşîya nê têkoşînî kerd ma înan selam kenê ke slogana Jin Jiyan Azadî kerd felsefeya cuye.''

Çîgdeme Kiliçgun Uçar nê vatî: ''Ewro vera elewîyan senaryoyî yenê hazirkerdene. Serekîya Cemevî naye ro.  No semedê xizmetê elewîyan nîyo, vera heqîqet û bawerîya elewîyan qeyûm o. Ma do vera nê têkoşînî xo bidomnê. Na dewleta reyna wazena elewîyan û kurdan têna biverdo. Şarê kurdî û komelê elewîyan  tênatîya na seserre açarnaye xoverdayîşê seserre. O xoverdayîşo ke ma ewro payra tepişeno û ano yewca. Şarê kurdî û komelê elewîyan rixmê heme zulmî nasname û erjanê xo canêverdeno. Ma rixmê sînoran, masefe û zordarîyan yewca de yê. Hêzê ma yo tewr pîl no têkoşîn o.

Tirkîya de qala dewrêkê newî yena kerdene la nê ra nêeşkenê vajê 'proses'. Çunke proses nameyê çîyo ke ameyo destpêkerdene yo. Heta ke Rayberê Şarê Kurdî Abdullah Ocalan ke aktorêko tarîxî yo, zîndan de bêro tepiştene ma nêeşkenê nê dewrî rê vajê prosesê muzakereyî. Birêz Ocalan ganî şertanê azadan û seyyewbînan de fîkranê xo îfade bikero. Tirkîya de qala çareserî kenê la hêrişê Rojawanî kenê. Ganî Îdareyo Xoser ê Rojawnaî bêro naskerdene. Rojawan de têkoşînê vera sîstemê kapitalîst û faşîstî yeno rayraberdene. Ma do bi na raştîye têkoşînê xo bidomnê.''

Badê deyîranê Tolga Sagî aktîvîte bi qiseykerdişanê temsîlkaranê dezgehanê mîsafîran dewam kerd.