Hemvervatoxê Kongreya Demokratîke ya Şaran (HDK) Alî Kenanogluyî derheqê kampanyaya 'Mîlyonêk îmzayî seba haştîye' de ajansê ma rê qisey kerd ke.

Kenanogluyî da zanayene ke 1ê teşrîna verêne ra nata ê xîretê prosesêkî de yê û vat: ''Nameyê ci nêameye dayene. Tewr zaf sîyasetmedarî nê prosesî ser o qisey kenê. Sey HDKyî ma vanê ke na mesele meseleyêka komelkî ya, waştişê haştîye ganî înîsîyatîfê sîyasîyan rê nêro verdayene, waştişê haştîye mîyanê komelî de bêro berzkerdene û wayîrê na kampanya bêro vetene. Coka ma na kampanyaya îmzayan daye destpêkerdene. Xora na hûmare sembolîk a. Ma hûmarêke hedef nêkenê. Çarçewa kampanya de ma herêmanê Ege, Dengizê Sipî û Reşî, Anatolîya Mîyanêne û Trakta de kombîyayîşan bikerê, rêxistinanan de ronişê û qalê haştîye bikerê. 

Sîyasetê şerî xora tesîrê komelî keno. Ma wazenê komelî reyde nê çîyan pare bikerê û bikerê ke komel ameyoxê xo înîsîyatîfê sîyasîyan rê nêverdo.''

Kenanogluyî îfade kerd ke şar samîmîyetê îqtîdarî perseno û vat: ''Prosesê xîretê haştîye de ganî komel bieşko fikranê zo vajo. Qalê prosesêkê haştîye, prosesêkê çareserîye yeno kerdene la hetê bînî ra qeyûmî yenê tayînkerdene, operasyonî yenê kerdene. Merdimî tim persenê ke 'gelo bi dewlete bawerîye yena kerdene?' Bêguman no ca meseleyêka bazarîye ya. Rojdemê sîyasetmedaranê kurdan zî est o. Waştişê serê meseleya kurdan est ê ke se serrî yo dewam kenê.

Sey HDKyî ma do tim destek bidê porsesî la terefê prosesî eşkera yê. Êyê ke çekan verdanê, êyê ke veng danê dîyar ê. Seba ke xizmetê haştîye bikerê nê prosesî de destê ma ra çi bêro ma do bikerê.La ganî ma naye zî vajê ke na masa masayêka winayên a ke waştişî ser o ronîyaya coka tede bazarîyî do bêrê kerdene. Seba ke komarêka demokratîke awan biba ma do têkoşînê xo rê dewam bikerê.''