Reya verêne 2011 de Tirkîya û Vakurê Kurdîstanî de vengdayîşê BDPyî ser o nimajê bêîteatîya sivîle amebî kerdene. Wextê nê çalakîyan de polîsî û şar tim ameyî têrî. 

9 serran ra dima Îstanbul de vera Kongreya Îslamê Demokratîkî (DÎK) û Komeleya Alîmanê Dînî (DÎAY-DER) 3ê temmuze de operasyonêk kerdbi. Çarçewa operasyonî de Serekê DÎAY-DERî Ekrem Baran zî tede 28 kesî ameybî destbendkerdene û nînan ra 9 kesî tepişîyayî.

Ronayoxanê DÎAY-DERî ra Nasrî Tonguço 64 serre amebi destbendkerdene û dima vera dîya. Tonguçî ANFyî rê derheqê mesele de qisey kerd. 

Tonguçî da zanayene ke îfade de nînan ra amebi persekerdene ke çira bi kurdkî xutbe wanenê, fînansê komele senî beno. Tonguçî vat: ''Ma înan rê tek tek vat. Îstanbul de 6 camîyê ma estê ma nînan de bi kurdkî xutbe danê, bi erebkî û tirkî zî danê, ma tazîyeyan nanê ro. TRT6 de zî tay îmamî bi kurdkî xutbe danê. Polîsî bi taybetî ameyeyê ma ser vindertî. Şarê ma ameyeyê ma danê. Înan pêro avûkat, sîyasetmedar, wekîlî girewtî, ma zanayêne ke dore ameya ma. Ê xeta ma ra tersayî, 9 embazê ma tepiştî. Armancê înan tersnayîşê şarî yo. Kerdişê ma bêîteatîya sivîl a.

AKP medreseyanê xo rê çîyê winasênî nêkeno. Hînî misilmanê AKPgîrî zî kerdişê înan vînenê. Semedo ke ma xeta Şêx Seîd, Ehmedê Xanî, Cizîrî ser o şinê ma rê wina kenê. Ma do qetî tewirê xo ra tawîz medê û xebatanê xo rê dewam bikerê. Armenîyan, pîranê elewîyan ma zîyaret kerdî. Bi kîlometreyan dûrî ra merdimî yenê tewrê nimajê ma yê îneyî benê. No zî mojneno ke rayîrê ma rayîro raşt o.''

Tonguçî peynîya qiseykerdişê xo de da zanayene ke înan Roşanê Qurbanan de zî nimajê roşanî bidê kerdene.