Almanya babeta SÎHA de hîşyarîye daye dewleta tirke

Derheqê kişîyayîşê 3 cinîyan ê kobanîyijan de Wezîrê Dewlete yê Almanî Niels Annenî dewleta tirke ra waşt ke xebitnayîşê SÎHAyan goreyê qanûnanê mîyanneteweyîyan têbigêra.

Dewleta tirke rojanê peyênan de hem Rojawan de hem zî Başûrê Kurdîstanî de hêrişê  SÎHA zêdînayî. 23ê hezîrane de dewleta tirke dewa Helincê ya Kobanê de 3 cinîyê kurdî pê SÎHA kiştî, 25ê hezîrane de zî reyna hêrişê SÎHA de 2 sivîlî kiştî û 8 kesî birîndar bîyî.

Derheqê qirkerdişanê dewleta tirke de Partîya Çepe ya Almanya vernîyazêkî da Meclîsê Federalî. Wekîlê Partîya Çepe Andrej Hunkoyî derheqê babete de persêk persa. Hunkoyî persa ke Hukmato Federal derheqê hêrişê 23ê hezîrane de çi fikirîyeno û do se bikero.

Nameyê Hukmatê Merkele ser o Wezîrê Dewlete Niels Annenî cewab da vernîyaz. Annenî vat: ''Ma tim Tirkîya ra waşt ke sivîlan bipaqa û goreyê huqûqê mîyanneteweyî têbigêra.'' Anenî Tirkîya hîşyar kerde. Rayedaranê Hukmatî zî waşt ke Tirkîya goreyê huqûqê mîyanneteweyî têbigera.