Welatperwero kurd Halîl  Şeno ke 1971 de Erûhê Sêrtî de ameyo dinya û 25 serrî yo bajarê Dresdenî yê Almanya de ciwîyeno serrgêra Komployê 15ê Sibate de vera tecrîdê Îmraliyî xo vêşna, şehîd bi.

Şenî verê Meclîsê Eyaletî yê Dresdenî de xo dima mektûbêk verda ke tede vano o vera tecrîdî na çalkîye keno û xo vêşna.

Şeno ke Dresden û doreyê ci de yeno naskerdene û heskerdene 13 sibate semedê tewrbîyayîşê çalakîya vera komployî ya Berlini keye ra vejîya û dima ra tira xebere nêameye girewtene. Îdarekaranê Komeleya Dostîye ya Alman Kurdî ya Dresdenî polîsan rê muracatê vînîbîyayîşî kerd. Polîsî ewro netîceyê testê DNA eşkera kerdî ke ame tesbitkerdene nasnameyê Şenî yo. Eşkerayîya polîsan de ame vatene ke roja îneyî nizdîya saete 13:30 merkezê Diresdenî de Şenî bedenê  xo xêşna û wexto kilm de cuya xo vînî kerde. Yeno pawitene ke keyeyê Şenî cenazaya xo bîgiro.

Mektubê Haîl Şenî

Mektubo ke keyeyê Şenî de ame vînayene de yeno vatene ke o semedê protestokerdişê tecrîdê Îmraliyî serrgêra Komployê 15ê Sibate de çalkîye keno. Şenî bale ante grevê vêşanîye yê zîndanan ke vera tecrîdî yeno kerdene ser zî û vat: ''Bihezaran cinîyê kurdî zîndanan de yê. No serewedaritişê min o. Kam ke vano ez kurd a, welatperwer a, Kurdîstan welatê min o, êyê ke wazenê wa Kurdîstan azad bo, şarê kurdî yo welatpewer û dostê înan ganî helêke cuwa ver hîsgêr bê.‘‘

Şenî hêrişê îşxalkerî yê vera kurdan zî ardî vîrî û vat: ''Nê hêrişî vera çar leteyanê Kurdîstanî yenê kerdene. Ça beno wa bibo hêrişê kurdanê bianoran û dostanê înan kenê ke werte ra wedarê. Vera nayî kurdî û dostê înan eke dormeyê ercan de bêrê têhet û xover bidê, bi kede û bedelan eşkenê bi kurdîye, ziwan, tarîx û orf edatanê xo biciwîyê. Eke ma wina mekerê , ma do vînî bikerê, merdimîye do vînî bikero. Ma destûrê nayî medê.''

Şenî ard ziwnake bitaybetî Ewropa û dîaspora de kurdî û hetê demokratî hîsgêr tênêgêrene û vat:''Na bêvengîye qet çewî nîna.'' Şenî best pa ke têkoşînê 45 serran ê PKKyî eynî wextî de têkoşînê merdimîye yo.

Şenî peynîya mektubê xo de nê vatî: ''Ma rojanê serrgêra  22. ya Komployê Mîyanneteweyî yê vera Rayberê merdimîye Rayber Apoyî de yê.  Dekewîyeno serra 23.  Heme hêzê û hemkarê  ke Komployê 15ê Sibate yê 1999î de ca girewt ez înan şermizar û lanet kena û înan ra vana ke Rayber Apo do tim rayîrê merdimîye roşn bikero. No zî wa zereyê komploker û hemkaran de kul bo.

Tîja ma Serek Apo 50 serrî yo rayîr ramojneno merdimîye, roşn keno û wayîrê merdimîye vejîyeno do wayîr vejîyayîşî rê dewam bikero. Semedê azadîya bianore bedel hewce keno, merdimanê bianoran bedelî dayî, merdimê boanorî do ewra ra tepîya zî bedel bidê û danê.''