Wexto ke dewleta tirke 2018 de Efrîn îşxal kerdbi Almanya zaf vera Tirkîya nêvejîyabi. Hukmatê Almanya têna pê vatişê 'Wa sivîlî bêrê pawitene, huqûq nêro binpaykerdene' anqara şîret kerdbi.Teşrîna verêne ya 2019î de vera îşxalê dewleta tirke yê serê Rojawanî de zî têna bi hawayêkê sembolîkî vera Tirkîya ambargoyê çekan xebitnabi.

Labelê Hukmatê Federalî yê bi serekwezîrîya Angela Merkel di serran ra dima reya verêne pê vatişanê eşkereyan da zanayene ke ê vera estbîyayîşê dewleta tirke yê Rojawanî yê. Na eşkerayîye vernîyazê persî yê Partîya Çepe yê seba Rojawanî ra dima ameye dayene. Şêwirmenda Wezaretê Averşîyayîşî yê Federalî Maria Flachsbarth cewab da vernîyazê Partîy Çepe.

Vernîyazê persî hetê Parlamentera Partîya Çepe Hêlîne Evrîm Sommer ra ame dayene. Hêlîne herême de estbîyayîşê dewleta tirke rexne kerd.Flachsbarth îfade kerd ke argumanê dewleta tirke yê seba Rojawanî raşt nîyê û vat: ''Ma wextê operasyonê Kanîya Haştîye de zî da zanayene ke Tirkîya goreyê huqûqî tênêgêrena. ''

 Ftlachsbarh beyan kerd ke hukmatê înan plan kerd ke vera vîrusê Korona bi mîlyonêk euro hetkarî bido Rojawanî û hetkarîya dezgehanê sivîlan bikero.

Parlamentera Partîya Çepe Sommerî zî cewab sey 'pozîtîf' dî û vat: ''Gamêka girîng a ke reya verêne bi vengêkê berzî yeno vatene ke hêrişê Tirkîya yê vera Rojawanî meşrû nîyê. Ez paştî dana na eşkerayîye hukmatî.''