Zîndanê Stammheimî yê şaristanê Stuttgartî yê Almanya de roniştişê 90 û 91. ê dewaya 5 kurdîstanijan perey dest pêkerd û vizêr zî dewam kerd. Roniştiş de Veysel S., Ozkan T., Agît K., Cîhan A., Evrîm A. û avûkatê ci amade bîyî. Roniştiş de avûkatanê Evrim A., Agit K. û Ozkan T. pawitiş kerd. Avûkatan bale ante qanênê 129byî û polîtîkaya krîmînalîzasyonî ser.

Dewa de Evrîm A. rê cezaya zîndanî ya 2 serran û 6 mengan yena waştene. Avûkate Fransizka Nedelmann vera ney vejîyaye û vat: ''Pê îfadeyê îtîrafkerî û verê cigêrayîşê raştîya delîlan Evrîm A. ameye cezakerdene. Gef, şantaj û zûrê îtîrafkerî çin hesibîyayî.'' Avûkate waşt ke îtîrafker beyanê zûrî ra bêro cezakerdene.
Fransizka Nedelmann ver vejîyaye ke qedîyayîşê muhakeme ra verî heqê roniştişî yê Evrîm A. ame betalkerdene û vat: ''Seba ke muwekîlê mi pê 'terorî' yena sûcdarkerdene nêeşkena vejîya teberê sînoran, dest nîya pêro heqanê ci yê komelkîyan. ''

Avûkatê Agît K.yî Fatma Sayin zî mehkeme rê qala parçekerdiş û îşxalê Kurdîstanî kerde û pare kerd ke pêro kurdî 4 paçeyanê Kurdîstanî de û teberê welatê xo de xo ver danê.  Sayine vat: ''Têgêrayîşê sîyasî û çalakîyî pê qanûnê 129b yenê krîmînalîzekerdene. Goreyê mehkemeya Almanya kurdî terefgîrê PKKyî yê, tehlukeyîn û terorîst ê. Qanûnê 129byî ganî heqanê merdiman bipawitêne. Îdîanameyê Agît K.yî de mesajê telefonî estê la nê sûc nîyê. Reyna kincê tradîsyonelî yê kurdan zî sey unîforma ameyî mojnayene.''

Avûkatê Ozkan T. Antonia Von Der Behrensî zî ard ziwan ke seba ke menfaatê tirkan û Almanya yewbîn tepişenê na dewa yena kerdene û wina dewam kerd: ''Coka na dewa dewêyêka sîyasî ya. Dozgerî rixmo ke delîlêk çin o goreyê îfadeyê îtîrafkeran têgêrenê.''

Avûkatê bînî yê Ozkanî Dr. Bjorn Elberlingî vat: ''Îdîayê îtîrafkerî pûç ê. Nê kesî şantaj û xespî ra nêeşkenê bêrê muhakemekerdene. Ozkan T. 2,5 serrî yo tepişte yo û tede nêweşîyê cidî estê. Ozkan T. kanserî ra xelisîya la mîyanê şertanê Korona de rewşa ey bena xirabêr.'' Avûkatî waşt ke muwekîlê ci bêro veradayene.

Heyetê mehkeme peynî de soz da vergumanan û înan zî paştî daye pawitişanê avûkatanê xo. Veysel S.yî vat: ''Şertî se benê wa bibê mi seba şarê xo têkoşîn kerd. Ez nika ra pey zî do naye bikerê esas.''

Heyetê mehkeme seba eşkerakerdişê bire roniştiş taloqê 30ê nîsane kerd.