Grûbê faşîstî yê sey 'Ulkucu' û 'Bozkurtan' ê ke îqtîdarê faşîstî yê Erdoganî ra cesaret gênê Ewropa de asayîşê welatan rê gef wanenê. Ulkucuyê ke hêzê paramîlîterî yê AKP-MHPyî yê vera kurdan, armenîyan û yahudîyan sûcê nefretî kenê.

Bi desan reyî ameyî îsbatkerdene ke nê hêzî hetê AKP-MHP û MÎTî ra yenê serûberkerdene. 29ê teşrîna peyêne ya 2020î de şaristanê Dijonî yê Fransa de ulkucuyan hêrişê armenîyan kerd. Nê hêrişî ra dima Parlamentoya Almanya têgêrayîşê Ulkucuyan welat de qedexe kerd. 

Na bire ser o 6 mengî derbaz bîyî la hema zî Wezaretê Karanê Zereyî yê Almanya seba qedexekerdişê nê grûban ê nîjadperestan tênêgêra. Heman wezaret wexto ke babate kurdî biba destê ci ra çita yeno kena.

Almanya de tewr tay mîlyonêk kurdî ciwîyenê û nê kurdî maruzê sîyasetê krîmînalîzekerdişî benê. Almanya de alayê YPG û YPJyî û posterê Rayberê Şarê Kurdî Abdullah Ocalanî qedexe yê. 2015 ra nata tehqîqatê sîyasî yê vera kurdan zaf zêdîyayî.

Goreyê cigêrayîşanê ANFyî 2020 de derheqê tewr tay 100 kurdan de tehqîqatî ameyî akerdene. Reyna Almanya de kurdî yenê teqîbkerdene, fîşkerdene, heqê multecîtîye û hemwelatîye nêdîyenê kurdan.  Goreyê Îdarekarê Komeleya Avûkatan ê Komargîran (RAV) Avûkay Lukas Theuneyî nê kerdişî bi xo waştişê taybetî yê Serekkomarê Tirkîya Erdoganî yê.

Theuneyî ard ziwan ke Almanya xîret kena ke waştişanê Erdoganî bêkêmasîyêke bîyara ca. Theuneyî vat: ''Sebebo bîn ê nê hêrsê vera têgêrayîşê azadîye yê kurdan menfaatê Almanya yê. Têgêrayîşê winasênê ke benê pîl û komelî ra vila benê Almanya tersnenê. Coka Almanya sempatîzananê têgêrayîşê kurdan teqîb kena û derheqê înan de tehqîqatan akena.''

Şaredaro verên ê Hannoverî Herbert Schmalstieg zî pê kerdişanê Almanya yê vera kurdan qayîl nîyo. Herbert Schmalstiegî waşt ke Almanya zî wa sey Fransa vera grûbanê nîjadperestan ê tirkan tay biran bîyara ca.

Herbert Schmalstiegî vat: ''Meclîso Federal ê Almanya ganî derheqê nê grûban de vernîyazêkê neweyî bîyaro rojdemê xo û kamyew organîzasyonî do bêrê qedexekerdene bi hawayêkê zelalî eşkera bikero.''

Herbert Schmalstiegî sîyasetê krîmînalîzekerdişî yê Wezaretê Karanê Zereyî yê Almanya yê vera kurdan rexne kerd û vat: ''Ganî Wezaret nê tewirê xo bivurno.''