Bi wesîleya rojbîyayîşê 76ine yê Rayber Apoyî mabênê tarîxanê 3-4ê nîsane de qezaya Xelfetî ya Riha de do fesîvale bêro kerdene. Platformê Dezgehanê Demokratîkan Amara de vera banê ke Rayber Apo tede bîyo, eşkerayîye daye.

Wekîla DEM Partî ya Amedî Ceylane Akça, Hemşaredarê Xelfetî Sanîye Bayram  û Mehmet Karayilan ê ke herinda ci de qeyûm ame cakerdene û hemwelatîyî tewrê ci bîyî.

Aktîvsta Tevgera Jinên Azad-TJA Mulkiye Gulmez veng da ke wa her kes tewrê aktîvîteyanê 4ê Nîsane bibo û vat gerek her kes paştî bido rayraşîyayîşê ciwanan ke ewro ame destpêkerdene.

Hemserekê TUHAD-FED Kerem Canpolatî zî waşt wa tecrîdê serê Rayber Apoyî bêro wedariten eû nê vatî: ''Birêz Ocalanî bi vengdayîşê xo yê 27ê sibate waşt wa hinî dayîkî mebermê û ciwanî nêrê qetilkerdene. Gerek ma wayîrê nê vengdayîşî bivejê ke destê Birêz Ocalanî xurt bikerê. Wayrîvejîyayîşê 4ê nîsane wayîrvejîyayîşê azadîye û haştîye yo. Na serre do biba serra xoverdayîş û azadîye. Ma veng danê pêro şarê xo ke wa tewrê na festîvale bibo. Birêz Ocalanî game eşte , nika dora dewlete ya. Semedê azadîya Birêz Ocalanî gerek ma 4ê Nîsane de xoverdayîşî girder bikerê.''