Rojbîyayîşê 73. yê Rayberê Şarê Kurdî Abdullah Ocalanî keyeyê ci yê dewa Amara ya qezaya Xelfetî ya Riha de bi deyîran ame pîrozkerdene.

Rixmê heme astengkerdişan kurdan verê xo da Amara. Bi seyan leşkeran pê wesayîtanê zirxinan rayîrî girewtî. Şaro ke rayîr de ame vindarnayene otobanan de govende girewte. Êyê ke resayî Amara keyeyê Abdullah Ocalanî de rojbîyayîşê ey fîraz kerd.

Birayê Abdullah Ocalanî Mehmet Ocalan û Wekîlê HDPyî yê Riha Omer Ocalanî şar verwazî kerd. Omer Ocalanî ke tîya qisey kerd vat: ''Ma 4ê Nîsane de Amara de yê. Dormeyê dewe gerîyayo binê ablûqa. Destûr nêda ke şarê ma bêro Amara. Her kesî waştêne ke ma reyde bêro Amara. Şar bi hewayêkê bêhuqûqî ame astengkerdene. Her kes eşkeno keyeyê xo de 4ê Nîsane fîraz bikero. Ma reyna vanê: Rojbîyayîşê 73. yê Birêz Ocalanî wa fîraz bo. Meseleya kurdî bi muhatabîya Birêz Ocalanî yena çareserkerdene. Raşt oyo ke dîyaolog û pêvînayîş dest pê bikerê. Pê dîyalogî Tirkîya eşkena bireso haştîya bianore.''

Badê qiseykerdişan hunermendan yew fekî ra deyîra ''Ay dilbere'' vate û rojbîyayîşê Abdullah Oclalanî fîraz kerd.