Rêxistina HDPyî ya Amedî bi wesîleya serrgêra Qirkerdişê Şingalî Parka Hazale ya Yenîşehîrî de eşkerayîye daye. Îdarekarê HDP, DBP û aktîvîstê TJA yê bajarî û temsîlkarê rêxistinanê sîvîlan ê komelî tewrê eşkerayîye bîyî.

Vervatoxa Meclîsê Cinîyan ê HDPyî yê Amedî Yesemîne Uçer qirkerdişê vera cinîyan ê Şingalî vist vîrî û vat: ''No hêriş vera merdimîye ame kerdene. Dejê qirkerdişê DAÎŞî hema zî ganê ma dejnenê. Hetê DAÎŞî ra 6 hezar û 417 kesî ameyî remnayene ke 3 hezar û 518ê înan cinî bî. Ma na roje xo vîr ra nêkerde, ma do hesabê cinîyan ê ke bazaranê koleyan de ameyî rotene bipersê.''

Wekîla HDPyî ya êzidî Feleknase Uca zî ard ziwan 3ê tebaxe sey roja reşe tarîxî de cayê xo girewt û vat: ''Înanê ke vizêr vatêne ma Şingal pawenê ma ê 3ê tebexe dîyî. Êzidîyî têna verdayî û remayî.8 serrî ravêrtî, bi se hezaran kesan Şingalî ra bar kerd. Cinî pê rêzilan girêdayî û bazaranê Mûsûlî de ameyî rotene. Şexsê cinîyan êzidîyan de heme cinîyî raştê qirkerdişî ameyî. Hema aqibetê 2 hezar û 700 cenîyan nîno zanayene. Nê heme verê çimanê dinya de qewimîyayî. Şingal bi dejanê xo têna ame caverdayene. 12 di şerwananê azadîye Şingal de korîdor akerd û verê fermanêkê girdêrî girewt.  Înanê ke peyê xo kerd Şingalî, vizêr Şingal têna verda ewro heqê înan çîn o ke qala Şingalî bikerê.

Badê hêrişê DAÎŞî Şingal de xoverdayîşêko xurt vejîya werte. Şingal de cuyeyêka newî ameye înşakerdene. Ganî wayîrê nê têkoşînî vejîyê. Şingal de yew fermanî ra zafêr çî qewimîya. Ma 74 fermanan de çok nêda, ma do ewro zî çok medê. DAÎŞî ra dima pê Pêkerdişê 9ê Teşrîna Verêne û teyarayanê şerî yê Tirkîya yeno waştene ke Şingal bibo veng. Êyê ke nê wazenê wa bizanê ke ê do ser mekewê. Komelo xoverdayox do qerarê xo bi xo bîgêro. Çew nêeşkeno peyê beranê qefilnayene de derheqê Şingalî de qeraran bîgêro. Êzidîyî do çirey verê zextan de çok medê û tim wayîrê tarîx, ziwan û kulturê xo vejîyê.''