Amed saetanê rewî yê serê sibayî de polîsanê tirkan eşt Komeleya Cigêrayîşê Ziwan û  Kulturî yê Mezopotamya (MED-DER) û Pirtûkxaneyê Payîzî ser. Dima ra Kooperatîfê Ziwan û Hunerî yê Anka zî ame sereştene. Xeylêk kîtabî, rojname, kovar û meteryalê dîjîtalî ameyî destsernayene û 23ê kesî ameyî destbendkerdene. Sereştişê polîsan serkêşîya MED-DERî de verê banê komele de ame protestokerdene.

Pîya bi temsîlkaranê partîyanê sîvîlan û rêxistinanê kolemê sîvîlî yê bajarî xeylêk kesî tewrê eşkerayîye bîyî. Tewrbîyayoxan tîşortê ''Ziwanê ma estbîyayîşê ma yo'' kerdî pirayî û dovîzê ''Ziwano azad, komelo azad'' kiriştî. Eşkerayîye de pankartê ''Her wext kurdkî, her ca de kurdkî'' ame kerdene û sloganê sey “Be ziman jiyan nabe”, “Bijî zimane Kurdi” û “Zimane me rumeta me ye” ameyî vatene.

Hemsereka DBPyî ya Amedî Sultane Yaray sereştişî şermezar kerdî û vat: ''Çîyo ke nêame kurdan ser nêmend la şarê kurdî çirey estbîyayîşê xo  canêverda.Wa heme dinya zulmê serê kurdan bivîno. 2 mîlyon domanan dest pê perwerdeyî kerd la domanê kurdan nêeşkenê bi ziwanê xo perwerde bivînê. Kurdî mergî ra nêtersenê, tim wayîrê ziwanê xo vejîyenê. Heme embazê ma ke dersa kurdkî danê destbend kerdî. Wa hol bizanê ke ma bi ziwan û nasnameyê xo est ê. Çew nêeşkeno ma waştişê azadîye ra bifîno dûrî. Wazenê ke şexsê Abdullah Ocalanî de vengê kurdan kêm bikerî la şima nêeşkenê kurdan bikerê bêveng.''

Xebatkarê MED-DERî Mehmet Asena ke eşkerayîye wende ard ziwan ke hêrişî vera ziwan, kultur, nasname, erjan û waştişê perwerdeyê bi ziwanê dayîke ameyî kerdene û nê vatî: ''Wa îqtîdaro faşîst bizano ke têkoşînê ma do vera hêrişan dewam bikero. ziwanê kurdkî xeta ma ya sûr a. Wazenê bi hêrişan kurdkî werte ra wedarê. Ma vera hêrişan çirey milê xo çewt nêkerd, ma do ewro ra tepîya zî milê xo çewt nêkerê. Ma do têkoşînî xurtêr bikerê. Bedelê ci çi beno wa bibo heta ke ziwanê kurdkî bibo ziwanê perwerdeyî ma do têkoşîn bikerê. Ganî bi seferberîye ma semedê kurdkî têkoşîn bikerê. Ma her ca bikerê warê perwerdeyî. Nê hêrişê pabesteyê tecrîdê serê Birêz Abdullah Ocalanî yê. Coka ma her cade têkoşînî xurtêr bikerê. Tecrîdê serê Abdullah Ocalanî wedarê û ziwanê kurdkî bikerê ziwanê perwerdeyî.''

Wekîlê DEM Partî yê Amedî Serhat Erenî zî sereştişê vera dezgehanê ziwanî yê kurdan sey dişmenîya vera kurdan name kerd û vat: ''Ziwanê kurdkî estbîyayîşê kurdan o. Şima hêrişê estbîyayîşê kurdan kenê. Ma do wayîrê ziwanê xo bivejîyê. Seba ke vera tecrîdê serê Abdullah Ocalanî vengê nêrazîbîyayîşî berz nêbeno her roje hêrişî zêdîyenê. Hema ke dore nêameyê înan ganî dezgeh û partîyê sîyasîyî yê Tirkîya vengê xo berz bikerê.''

Eşkerayîye de dîya eşnawitene ke ewro do saete 17:30 de Meydanê Şêx Seîdî de hêrişî bêrê protestokerdene.