Hemşaredaranê  Şaredarîya Bajarê Pîlî ya Amedî yê Partîya Demokrasîyî û Têdûşîtîye ya Şaran (DEM Partî)  Dogan Hatun û Serra Bucak û hemşaredaranê qezayan saetanê nêmroje de Heyetê Weçînayîşî yê Bajarî ra mazbatayê xo girewtî.

Pîya bi Dogan Hatun û Serra Bucak hemşaredarê Şaredarîya Karazî Mehmet Şik û Hanime Altindag, Hemşaredarê Rêzanî Leyla Ayaz û Siraç Çelik, Hemşaredarê Bismilî Mizgîne Ekin û Guven Tanrikulu, Hemşaredarê Sûrî Fatma Onkol û Adnan Oran, Hemşaredarê Bjarê Nû Safîye Akdag û Mehmet Ergunî û endamanê meclîsê şaredarî mazbatayê xo girewtî.

Mayê Haştîye, atkvîstê TJA û Vervatoxa Meclîsê Cinîyan ê DEM Partî Halide Turkoglu zî hemşaredaran reyde şîyî.

Hemşaredaran bado ke mazbatayî girewtî verê Heyetê Weçînayîşî yê Bajarî de fotograf  vet û tîya ra bi şarî verê xo da Meydanê Şêx Seîdî ke tîya ra şirê  banê xizmetî yê Şaredarîya Bajarê Pîlî. Meydanî ra ver bi şaredarî bi slogana Jin Jiyan Azadî rayraşîyayîş ame kerdene.

Banê şaredarî de eşkerayîya çapemenîye ameye dayene. Verî Hemsereka DEM Partî ya Bajarî Pinare Sakik Tekin qisey kerd. Tekîne vat: ''Vera înanê ke kurdan îmha û înkar kenê ma ser kewtî, ma têkoşînê xo bi serkewtişî tacîdar kerd.''

Serra Bucak zî vat: ''Dayîkê ma yê sînayeyî, cinîyê ma yê xoverdayoxî, hemrayê ma yê ciwanî, şarê Amedî tîya yê şima yo. Şaredarî yê şima ya, bajar ê şima yo. Şima zaf kede daye, weş û war bê. 2016 de tîya qeyûm ame cakerdene û Gulatane Kişanak û Firat Anli bîlasebeb ameyî hepskerdene. 2019 de Selçuk Mizrakli û Hulya Alokmen Uyanik bado ke mazbatayê xo girewtî ameyî hepskerdene. Ma înan rê selamanê xo şawenê. No şar têkoşînî canêverdeno.Ma tîya ra soz danê şarê xo ke ma do qeyûman ra verê huqûqî de hesab bipersê. Ma do pîya bi şarê xo bajarê xo îdare bikerê.''

Dogan Hatunî zî nê vatî: ''Ma semedê keda şima mînetdar ê. Ma mîrasê serek Selçuk û sereke Hulya teqîp bikerê. Ma do karê Gultane Kişanak û Firat Anliyî yo ke AKPyî nimcet verda, newera înşa bikerê. Ma pê şarê xo bawer ê, wa paştîya şima zî ma ra pêt bo. Ma do 5 serrî xizmetê şarê xo bikerê. Ma têna kesanê ke raya daya ma înan rê xizmet nêkenê, ma do heme şarê Amedî rê xizmet bikerê. Ma do pîya kuçeyanê xo pak bikerê, yewbînan ra hes bikerê. Ma ser kewtî, serkewtişê ma gird o.''