13ê teşrîna verêne de bi vengdayîşê DEM Partî Amed de do Mîtîngê Azadîye bêro kerdene. Xebatê mîtîngî xeylêk bajaran de dewam kenê. Rixmê qedexeyê walîtîye xebatî yenê rayraberdene, bajar de hêyecanêko xurt zî est o. Hemserka DBPyî ya Amedî Sultane Yaray derheqê mîtîngî de qisey kerd.

Sultane Yaray ard ziwan ke ê do 13ê teşrîna verêne de rixmê qerarê qedexî pîya bi pêro şarî warê mîtîngî de bê û nê vatî: ''Rojhelatê Mîyanênî de şerêk qewimîyeno û ver bi newera dîzaynkerdişê Rojhelatê Mîyanênî game bi game yeno averşîyayene. Seba ke no şer biqêdîyo û haştîye bêra ganî kurdî Rojhelatê Mîyanênî de heqanê xo yê meşruyan bifînê dest. Bi destfînayîşê destkeweyanê kurdan peynîyê şeran zî do bêro. Semedê nê zî ganî haştîya zerî biba û adresê nê zî Îmrali yo, Birêz Ocalan o.  Ma reyna vanê ke hinî tehamulê ma nêmend, wa tecrîd bêro wedaritene û meseleya kurdan bêra çareserkerdene. Îqtîdar prosesî mîyanê zemanî de vila keno, wazeno şarê kurdî bixapîno. Butçeya girde yê Tirkîya semedê şerî yena xerckerdene. Wa hinî butçe şerî rê nê semedê hûzûrî bêro xerckerdene.  Şarê kurdî raştîyêka na herre ya. Ma bi polîtîkayanê zext û asîmîlasyonî çîn nêbenê.''

Sultane Yaray bale ante qedexeyê walîtîye yê panc rojan ê semedê çalakî û aktîvîteyan ser û vat: ''Ma destûrê mîtîng girewt û dest pê xebetan kerd. No qerarê qedexeyî keyfî  û sîyasî yo. Hetê ci yê huqûqî çîn o. îqtîdar mîtîngo ke şar tede waştişanê xo ano ziwan qedexe keno. Îqtdîar heqê qiseykerdişî nêdano kurdan. Heqê ma yo demokratîk yeno astengkerdene. Ma nê qebul nêkenê. 13ê teşrîna verêne de se beno wa bibo ma do meydanan de bê, ma mîtîngê xo bikerê ke kurdî dostê înan bi heyecanî pawenê.  Waştişê ma yo verên azadîya fîzîkîye ya Birêz Ocalanî ya. Tecrîd çend  xorî  beno rijnayîşo komelkî zî  xorî beno. Coka ganî ma semedê azadîya Birêz Ocalanî têkoşînê topyekunî bikerê. No mîtîng zî cayê nê yo. Ma veng danê şarê xo, bêrê ma pêro vera tecrîdî semedê azadîye biqîrê.''