21ê adare de Newroze Amed de bi şîarê 'Wurzê we, wext wextê serkewtiş û azadîye yo' do bêra fîrazkerdene. Seba şayîye DEM Partî, Têgêrayîşê Cinîyan ê Azadan (TJA) û Kongreya Komelê Demokratîkî (KCD) pîya xebitîyayî.

Hemsereka DEM Partî ya Amedî û Sereka Komîteya Amadekarîye Pinare Sakik Tekîn derheqê Newroza Amedî de ANFyî rê qisey kerd.

Pinare da zanayene ke şayîye Parka Newroze ya qezaya Rezanî de do bêra kerdene û vat: ''Seke zanîyeno emser adare de weçînayîşî zî est ê. Newroze ma rê sembolê xoverdayîş û têkoşînî yoç Ma bi şîarê xo 'Wurzê we, wext wextê serkewtiş û azadîye yo' nê mesajî danê ke seba şiknayîşê tecrîdî ma do meydanan de bibê. Bêrê ma pêro pîya vera rejîmê tekcamêrdî û ferzkerdişan meydanî dekerê û bibê vengê azadîye û haştîye. Ma pabeyê pêro şarê xo yê.

Newroze de ma, namzedê ma yê şaredarîyan, wekîlê ma û îdarekarê partîyê ma do meydan de bibê. Ma nika ra tedbîrê xo girewtî û amadekarîyê ma qedîyayî. Ma amade yê ke şarê xo reyde Newroze fîraz bikerê. Sey DEM Partî paradîgmaya ma pêro beşanê komelî verara xo kena. Ma venga pêro komelî, bawerî û şaran danê ke bêrê ma pîya têkoşînî pîlêr bikerê, warê Newroze de adirê Kawayî gir bikerê. Bêrê ma pîya adirê Newroze bivisnê ta.''