Vera hêrişê îşxalî yê dewleta tirke yê vera Başûrê Kurdîstanî nêrazîbîyayîş dewam kenê. DBP, TJA, MED TUHAD-FED, MEBYA-DER û Mayanê Haştîye Amed de eşkerayîye daye.

Kombîyayîşo ke Buroyê Şewirmnedîye yê Amedî yê DBPyî de ame kerdene verî Hemsereka Pêroyî ya DBPyî Çîgdeme Kiliçgun Uçar qisey kerd.

Uçare bale ante ser ke pêşmergeyê PDKyî û çeteyê DAÎŞî zî paştî danê artêşa tirke û vat: ''Başûr de bi zanayîşê PDKyî seyî ra zafêr baregehê leşkerî yê tirkan ameyî ronayene, bi desan qerarolî ameyî ronayene. Îqtîdarê Erdogan û Bahçelî wazeno bi nê şerî warê îşxalî hîra bikero. Rîyê nê şerî û polîtîkayanê îşxalî ra 9 serranê peyênan de 750 hezar kesan erdê xo ra bar kerd ke înan ra se ra 80 kurd ê. Menge hezîrane ra 102 dewî ameyî vengkerdene. Vengkerdişê dewan de çeteyanê DAÎŞî û pêşmergeyanê DAÎŞî aktîf rol girewt. Vera 602 dewan zî zext dewam keno ke bêrê vengkerdene. Çeteyanê ke DAÎŞî ke Şingal û Rojawan de tecawuzê cinîyan kerd, cinîyî bazarê koleyan de rotî, merdimî ganî ganî vêşnaye, sereyê pêşmergeyan birnayî, ewro bi destê PDKyî Başûr de yenê cakerdene. PDK bîyo AKPyê Başûrî, mergê kurdan de rol geno xo ser. PDK xetayo tarîxî keno ke ganî cadê tira agêro.''

Dayîka Haştîye Havva Kiran zî vera hêrişê îşxalî û îxanetê PDKyî  hêrsê xo ard ziwan û vat: ''Keyeyê Barzanî sey virzêrî ewro îxanet keno. Hinî bes o, ma îxanetê şima qebul nêkenê. Ma sey kurdanê bişeref û binamûsî şima qebul nêkenê. Ma sey dayîkanê haştîye yê ke zerrîya ci vêşeno, hinî nê qebul nêkenê. Îxanetê to rê hinî bes o. Ma verî vatêne Birêz Barzanî la nika nêeşkenê vajê. Cunkê destê to de gonîya qijanê ma est a. Hinî bes o, destanê xo gonîya kurdan ra biancê.''

Qiseykerdoxanê bînan zî vera hêrişê îşxalî û îxanetê PDKyî hêrsê xo ard ziwan û semedê yewîya kurdan û xurtkerdişê têkoşînî veng da.