Tepişteyê Dewaya PKK û PAJKî seba azadîya Rayberê Şarê Kurdî Abdullah Ocalanî û çareserîya meseleya kurda 27ê teşrîna peyêne ra nata grevê vêşanîye de yê.  Grevî reyde teda û îşkenceyê vera tepişteyan zî zêdîyayî.

Zîndanê Xarpêtî de tepişte Feyyaz Başakî bi telefonî keyeyê xo de qisey kerd û pare kerd ke tepişteyê sîyasîyê ke grevê vêşanîye de yê erzîyenê hucreyanê yewkesan. Başakî venga  avûkatan da ke wa zîndanî zîyaret bikerê. 

Zîndanê Amedî de Komeleya Huqûqnasan a Seba azadîye (OHD) tepişteyan de pêvînayîş kerd. Avûkatan da zanayene ke zîndan de dest nîyayo defter û kitabanê tepişteyan ser, tepişteyî sereştişan de ameyê tehtîdkerdene û binê nameyê cigêrayîşî de bi hawayêkê bûrûmetênî verê tepişteyan de têgêrayîşî ameyî kerdene.