Merdimanê tepişteyan Baroyê Amedî de seba ke bale binancê rewşa tepişteyanê nêweşan ser Nobeta Edaletî daye destpêkerdene. Çalakîye roja 35. de dewam kena. Rêxitina HDPyî ya Çermîkî û endamanê Şaredarîya HDPyî ya Çermîkî ke wezîfeyê înan ame xespkerdene, çalakwanî zîyaret kerdî.

Hemserekê HDPyî yê Çermîkî Berat Canî ke zîyaretî de qisey ked sere de Garîbe Gezer heme tepişteyê ke zîndan de dinyaya xo bedilnaye yad kerdî û vat: ''Tecrîdê Îmraliyî çend şino vila beno. Ganî tecrîd bêro wedaritene. Ma semedê paştdayîşî tîya de yê, paştî danê şima.''

Merdimanê tepişteyan ra Fevzîye Kolakan zî vat: ''Wa domanê ma, extîyarê ma bêrê veradayene. Xeylêk tepişteyî rixmo ke cezaya înan qedîyaya nînê veradayene. Bitaybetî tepişteyê nêweşî ganî cade bêbê veradayene. Eke mirênî zî wa cayê ma de keyeyanê xo de bimirê. Ma wazenê tepişteyanê xo tedawî bikerê. Ma veng danê berpirsîyaran û heme merdimanê tepitşeyan hinî bêveng memanê.''

Merdimanê tepitşeyan ra Încî Guler zî bale ante ser ke tena menga peyêne de pancê înan tepişteyê nêweşî hewt tepişteyan dinayaya xo bedilnaye û vat: ''Vera tepişteyanê sîyasîyan tewiro cîya yeno ramojnayene. Qanûnê efû vet, bi hezaran tecawuzkar, çete û qetilkarî veradayî. Tepişteyê sîyasî û kurdî rixmê nêweşîyanê xo vera nêdîyenê. Seba ke zîndan ra cenazayî mevejîyê ma dest pê na çalakîye kerde. Çalakîya ma ewro roja 35. de ya û heta nika 7 tepişteyî bi hewayêkê şîkdarî dinyaya xo bedilnaye. Ma qesawet kenê. Ganî her kes veng bido vengê ma. Ganî ma bibê vengê tepişteyan.''