Serrgêra Komployê Mîyannetweyî yê 15ê Sibate yê vera Rayberê Şarê Kurdî Abdullah Ocalanî de Meydanê Dagkapiyî yê Amedî de eşkerayîye ameye dayene. Verê eşkerayîye heme rayîrê ke şinê meydanî pê wesayîtanê zirxinanameyî qefilnayene. Polîsan meydan girewt binê ablûqa destûr nêda çew tewrê eşkerayîye biyo.

Wekîlê HDPyî Ebru Gunay, Hîşyar Ozsoy, Dersime Dag, Îmam Taşçier û Remzîye Tosun û grûbêka partîyijan resayî  meydan. Polîsan bi saetan partîyîjî meydan de vindarnayî. Keskê ke slogana "Bi can bi xwîn em bi te re ne ey Serok"  eşte herê polîsan ra ame destbendkerdene.

Vervatoxa HDPyî Ebru Gunay vat: ''Bi seyan kesanê ke waşt tewrê çalakîye bibî hetê polîsan ra gerîyayî binê tecrîdî. Ma sebebê naye zanê. Îqtîdarê AKP-MHPyî qerarê polîtîkayanê şer û tecrîdî girewto. 23 serrî yo Birêz Ocalanî binê tecrîdî yo. Komplo bi polîtîkaya tecrîd û şerî dewam keno. Asayîşê Amedî nêrazîbîyayîşê şarî yê vera tecrîdî ra terseno. Seba ke şar vera şerî haştîye wazeno tira terseno. Çunke ê şer wazenê. Zanê ke şer mergo û no zî ran saweno nanê înan ro. Haştîye ameyox û hûzûrê nê welatî yo. Îqtîdar haştîye ra terseno. Seba ke ablûqa binimnê bisaetano ma de bazarîye kenê. Nê verdenê di kesî bêrê têhet. Vengê haştîye yo ke Amedî ra beno berz tira tersenê. Pê merg û şerî xo weye kenê. Ê se kenê wa bikerê ma do tim semedê haştîye têkoşîn bikerê.  Eke tecrîdê serê Birêz Ocalanî wedarîyo haştîye yena welat. Îqtîdar naye nêwazeno. Ma tîya ra qîrenê. Wa berê Îmraliyî bêrê akerdene. Wa haştîye bêro qiseykerdene.  Birêz Ocalan semedê haştîye veng dano la ê pê şer û tecrîdî cewabê ci danê. Ma do têkoşîn bikerê. Rojêk şima do rîyê nêkerdişanê xo yê bêhuqûqan ra verê hukmî de hesab bidê.''

Çewlîg de zî hetê rêxistina HDPyî ra verê Kuleyê Saete de eşkerayîye ameye dayene.  Parlamenterê HDPyî yê Çewlîgî û îdarekarê partîye yê bajarî zî tede şaro ke ke peyê pankarta  ''Ma tecrîdî bişikne, faşîzmî weşanê'' de ame têhet komplo şermezar kerd û waşt wa tecrîd bêro wedaritene.

Reyna Colamêrg, Êlih, Gever, Îzmîr, Adana û Mersin de zî bi eşkerayîyan komplo ame şermezarkerdene û azadîya Ocalanî ameye waştene.