Goreyê doneyanê Komeleya Heqanê Merdiman (ÎHD) zîndanan de hezar û 517 tepişteyê nêweşî est ê ke nînan ra rewşa 651ê ci giran a.

Hemvervatoxê Komîsyonê Zîndanan ê ÎHDyî Yusuf Erdoganî derheqê babete de ANFyî rê qisey kerd. 

Erdoganî bale ante ser ke Tirkîya de îqtîdarî vurîyayê la polîtîkayê zîndanan nêvurîyayê. Erdoganî vat: ''Tepişteyî şert û mercanê zîndanan de nêweş benê û seba ke nênê tedawîkerdene nêweşîyê înan giranêr benê. Bi taybetî sewqkerdişê nêweşxaneyan de xeylêk meseleyî qewimîyenê. Hetê bînî ra Dezgehê Tipê Edlîyî (ATK) bi raporanê xo veradîyayîşê tepişteyan asteng kenê. Rixmê nêweşîyanê giranan zî ATK raporê 'eşkenê zîndan de bimanê' dano. Nê raporan ra dima tepişteyî zîndanan de mirenê. 

Makbule Ozera 81 serre rê ATKyî hêverî raporê 'wa vera bidîya' dabi la dima raporê 'eşkena zîndan de bimana' da. Nimûneyê winayênî zaf ê. Ganî rêxistinê komelê sivîlî na babete de nêrazîbîyayîşê xo bimojnê. Derheqê veradîyayîşê tepişteyan de standartêk est o ke ganî bêro caardene.''

Erdoganî îfade kerd ke tepişteyê nêweşî zîndanan de terkê mergî yenê kerdene û vat: ''Mîsalê Mehmet Emîn Ozkanî verê ma de yo. Xeylêk xîretan ra dima bire dîyabî ke o bêro veradayene. A raşte dewlete eke tehlîyeya înan tay bimana tepişteyanê nêweşan ancax vera dana. Bi nê hawayî tepişteyî terkê mergî benê. No vurîyeno muameleya xirabe û îşkenceyo emrderg.''