Hemserekê Pêroyî yê HDPyî yo verên Selahattîn Demîrtaş rê rîyê qiseykerdişê ci yê Newroza Îstanbûlî ya 2013î ra cezaya 4 serran û 8 mengan ameyebî dayene. Cezaya ke Mehkemeya Cezaya Girane ya 26. ya Îstanbulî dayebî hetê Mehkmeya Berze ra ameye tesdîqkerdene.

Avûkatanê Demîrtaşî derheqê babete eşkerayîya nûştekîye daye. Avûkatan vat: ''Îqtîdarê AKP-MHP hesab kerd ke eke  Mehkemeya Heqanê Merdiman a Ewropa (MHME) derheqê Demîrtaşî de qerarê serbestverdayîşî bido seba ke Demîrtaşî zîndan de bitepişê dewayêka bînî hewce kena. Coka cezaya 4 serran û 8 mengan a bi îdîaya 'sûcê propaganda' 7ê êlula 2018î de ameyî dayene. Xora pêro zanê ke  no organîzasyonê hetanê sîyasîyan o û bi armancanê sîyasîyan ame kerdene. No hetê Daîreyê Pîlî yê MHME ra zî tescîlkerde yo. Ma do huqûq de israr bikerê.''

HDPyî zî bi eşkerayîyêka nuştekîye bale ante ser ke no leteyê planê tesfîyekerdişî yo û ê nê qerarê bêhuqûqî nas nêkenê.''