Avûkatê Rayber Apoyî Rezan Saricayî derheqê heqê hêvîye, prosesê neweyî û serebûtanê peyênan de ANFyî rê qisey kerd.

Rezan Saricayî vist vîrî ke Bahçelîyî seba caardişê heqê hêvîye vurnayîşê qanûnan waşto û vat: ''Raşt nîyo ke heqê bingeyîyî û azadîye bi polîtîkayanê hukmatî girêdaye bibê. Sere de qedexekerdişê îşkenceyî heqê bingeyî û azadîyî tarîxî ra nata eynî yê. Dewletî bi caardişê nê heqan mesuldar ê. Tirkîyaya ke Peymana Heqanê Merdiman a Ewropa (PHME) îmza kerda ganî goreyê biranê Mehkemeya Heqanê Merdiman a Ewropa (MHME) têbigêra. MHME venga Tirkîya dabi ke seba caardişê heqê hêvîye vurnayîşê qanûnan bikera. 

La rojdemê Tirkîya de tedeyîya vurnayîşê qanûnan çin a. Nîqaşê heqê hêvîye esasê mesele yo. Birêz Ocalan 26 serran ra nata tepişte  yo. Nê prosesî de ey seba çareserîyêka bi metodanê demokratîkan ê meseleya kurdan veng da. Seba sîstemêkê demokratîkî ganî heqê azadîye, heqê hêvîye û hewcedarîyê nînan bêrê nîqaşkerdene. Heqê hêvîye nêbeno babeta bazarî.

43 mengan ra dima Birêz Ocalanî keyeyê xo de pêvînayîş kerd. La ney teyna pacayêka Îmraliyî akerde. Naye ra ber Îmrali de vurnayîşêk çin o. 5 serran ra nata pêvînayîşê bi avûkatan nêno kerdene. Yanî eşkerayîyanê Bahçelîyî çîyêk nêvurna. Goreyê pêşnîyazanê CPT û MHME ganî gamê bitesîrî bêrê eştene. Hema zî raporê êlula 2022yî yê CPTyî nêame eşkerakerdene. Tecrîd hema zî dewam keno.''