Buroyê Huqûqî yê Asrinî raporê xo yê çar mengan ê serê Îmraliyî eşkera kerd. Rapor de qalê binpaykerdişanê heqanê vera Rayber Apoyî, Omer Hayrî Konar, Hamîlî Yildirim û Veysî Aktaşî ame kerdene.

Nê raporî reyde Komîteya Vergirewtişê Îşkenceyî ya Konseya Ewropa (CPT) rê muracatêko newe ame kerdene.

Muracat de dîya zanayene ke seba pêvînayîşê Rayber Apoyî 52 muracatê keye û avûkatan ameyê kerdene la nê bêcewab mendê. Rapor de ame parekerdene ke tewr peyên 7ê tebaxa 2019î de pêvînayîşê avûkatan ameyo kerdene û 23yê teşrîna verêne ya 2024î de zî pêvînayîşê keyeyan ameyo kerdene.

Rapor de bale ameye antene ser ke ganî heqê hêvîye seba tepişteyanê Zîndanê Îmraliyî bêro caardene.

Muracat de CPTyî ra nê çîyî ameyî waştene:

‘’Şertê Zîndanê Îmraliyî her ke şino benê giranêr. Ganî CPT cade şoro Îmraliyî.

-Wa CPT seba caardişê pêvînayîşan û vera binpaykerdişê heqan cade têbigêro.

-Wa CPT raporê xo yê serê zîyaretanê Îmraliyî eşkera bikero.’’