Rayberê Şarê Kurdî Abdullah Ocalanî Zîndanê Îmraliyî de bi hawayêkê giranî yeno tecrîdkerdene. Tepişteyê dewaya PKK û PAJKî 168 rojî yo vera tecrîdî û binpaykerdişanê heqanê xo grevê vêşanîye de yê.

Huqûqnas Cemîle Turhalli derheqê tecrîd û grevê vêşanîye de ANFyî rê qisey kerd.

Cemîle Turhalli vist vîrî ke goreyê peymananê mîyanneteweyîyan û goreyê qanûnanê Tirkîya heqê pêro tepişteyan esto ke pêvînayîşî bikerê. Cemîle vat: ''Eke merdim bira Mehkemeya Qanûnê Bingeyî bîyaro vîrê xo ke tesbît kerd heqê Birêz Ocalanî yenê binpaykerdene, hînî eşkera beno ke Tirkîya hem qanûnanê xo hem zî peymananê mîyanneteweyîyan û biranê Qanûnê Bingeyî binpay kena. Bira astengkerdişê pêvînayîşan hetê Wezaretê Edaletî ra dîyaye. Qanûn seba her kesî dîyar o. Nêzdîbîyayîşê hukmatî yê bi meseleya kurdan polîtîkaya 100 serran ra cîya nîya.

abdullah Ocalan wazeno meseleya kurdan pê metodanê haştîyaneyan çareser bikero.Prosesê çareserîye de aramîye ameye komel, fikr û pênîyazê Ocalanî komelî ra vila bibî. Tay hêzê ke şer sey tercîhê verênî vînenê naye ra ecîz bîyî. Nê hêzî êyê ke nika hukmatî reyde îtîfaq kenê.''

Cemîle Turhalli bale ante raporê CPTyî ser û vat: ''Sey endamêka Konseya Ewropa ganî Tirkîya bir û pêşnîyazanê CPTyî bîyara ca. CPTyî raporê xo de waşt ke peynîya tecrîdî wa bêra ardene. Tecrîd kerdişêko xirab o coka binpaykerdişê qedexekerdişê îşkennceyî yo. Astengkerdişê pêvînayîşî binpaykerdişêko giran ê heqan o. Caardişê heqanê qanûnê bingeyî wezîfeyê pêro otorîteyan o. Fikr û eşkerayîyê Abdullah Ocalanî do firsendêkê neweyî pêşkêş keno. Grevê vêşanîye seba tepişteyanê sîyasîyan eşkerayîyêka fîkrî ya ke bi nê rayîrî waştişanê xo otorîteya îdarî rê pare kenê.

Xora grevê vêşanîye de tepişteyî bedenê xo danê vêşanîye û pê tewirê polîtîkî waştişanê xo anê ziwan. Çalakîya ke merdimî yewparetîya xo ya madî û manewî  visnenê binê tehlukeyî eşkena krîzî werte ra wedarna. Tepişteyê sîyasîyî wazenê ke Tirkîya bi hawayêkê têdûştî qanûnanê mîyanneteweyîyan û neteweyîyan bîyara ca.''