Buroyê Huqûqî yê Asrinî derheqê îdîayanê ke medyaya sosyale derheqê Rayberê Şarê Kurdî Abdullah Ocalanî de weşanîyayî de eşkerayîye daye û waşt ke wa cade Îmraliyî ra xeberêke bêro girewene û lazabez pêvînayîşêk bêro kerdene.

Eşkerayîye wina ya:

''Muwekîlê ma birêz Abdullah Ocalan, birêz Omer Hayrî Konar, birêz Hamîlî Yildirim û birêz Veysî Aktaş  ê ke Zîndanê Îmraliyî de yê ma nêeşkenê înan dir pêvînayîşan bikerê. Avûkatan tewr peynî de 7ê tebexe ya 2019î de birêz Ocalanî dir pêvînayîş kerd. Muwekîlanê ma  27ê nîsane ya 2020î de rîyê şertenê pandemî ra reya verêne heqê xo yê telefonî şuxulna û pê rayîrê telefonî merdimanê xo de qisey kerd. A roje ra nata tekîlîya înan bi teberî çîn a.

Muwekîlê birêz Abdullah Ocalano ke ma nê tarîxî ra tira xebere nêgênê tarîxê 14.03. 2021 de medyaya sosyale de derheqê ey de hesabanê anonîman ra îdîayî erzîyayî meydan. Ma derheqê her îdîa de cipêrsayîşanê cîddîyan kenê. Ma nêzanê nê îdîayê ke ge-ge erzîyenê meydan hetê kamyew çimeyî ra yenê weyekerdene la ma rê çîyo muhîm oyo ke nê îdîayî derheqê brêz Ocalanî de benê. Bêşik seba ke Îmrali de tecrîdo xorî esto û pêvînayîşî nînê kerdene ma zafêr qerqilîyenê.

Seba ke qesawtî biqedîyê ganî cade Îmrali reyde pêvînayîşî bêrê kerdene. Ma israr kenê wa kanalê xebergirewtişî bêrê akerdene. Ma reyna veng danê berpirsîyaranê sîyasî û îdarîyan danê ke wa nê pratîkê şîdet û tecrîdî yê vera yew zîndanî û grûbêke caverdê û berpirsîyarîya xo bîyarê ca.''