Dewrê 27. yê Meclîsî de destpanêdayîşê wekîlan amebi betalkerdene. Ê çaxî ra heta nika derheqê wekîlan de xeylêk fezlekeyî  bi bahaneya ameyî amadekerdene. 

Derheqê Wekîlê HDPyî yê Çewlîgî û Endamê Komîsyonê Qanûnê Bingeyî yê Meclîsî Erdal Aydemîrî de zî bi bahaneya ke tewrê konferansêk bîyo fezleke ame amadekerdene. La Aydemîr tewrê nê konferansî qet nêbi.

Aydemîrî babete ercnaye û vat: ''Ez tewrê konferansî nêbîya la mi ser o fezleke ame amadekerdene. No zî mojneno  ke muhakemekerdiş senî destê îqtîdarî de yo.  Pêro têgêrayîşê wekîlanê HDPyî benê babeta fezlekeyan. Bi hawayêkê bêhuqûqî derheqê wekîlanê ma de tehqîqatî dîyenê destpêkerdene. Endamê muhakemerdişî pê armancanê sîyasîyan têgêrenê. ''

Aydemîrî ard ziwan ke dozgerê ke tehqîqatan danê destpêkerdene û fezlekeyan amade kenê goreyê huqûqî tênêgêrenê û vat: ''Ê bê delîlî û seba ke şorê weşê Eroganî nê fezlekeyan amade kenê. No zî yeno a mana ke muhakemekerdiş pê destê îqtîdarî kişîyayo.''

Aydemîrî venga Serekê Meclîsî Mustafa Şentopî da û vat: ''Şentop zî vano hende fezleke zêde yê. Ma venga Şentopî danê ke hînî derheqê HDPyî de fezlekeyî nêrê amadekerdene. Demokrasî, huqûq û demokratîbîyayîş pê xurtkerdişê muxalefetî mumkîn o.''