Aydemîr: Personelê ke bi kirdkî xizmet danê estê?

Wekîlê HDPyî Erdal Aydemîrî Wezaretê Weşîye rê pê vernîyazêkî persa: ''Servîsanê lezabezan de personelê ke bi kirkdî xizmet danê estê?''

Wekîlê HDPyî yê Çewlîgî Erdal Aydemîrî seba ke Wezîrê Weşîye Fahrettîn Koca cewab bido ci vernîyazêkê persî da Meclîsî.

Aydemîrî persa ke derheqê kirdkî de xebatê înan estê yan nê. Aydemîrî vat: ''Nufusê Çewlîgî hema hema bi temamî bi ziwanê xo yê dayîke kirdkî qisey kenê. Xeylêk hemwelatîyê nêeşkenê bê kirdkî xo îfade bikerê û coka tay dezgehan de raştê zehmetîyan yenê. Bi taybetî nêweşxaneyan de pê rayîrê açarnayoxan şar ganî bieşko xo îfade bikero.''  

Aydemîrî vernîyazî de nê çîyî persayî:

-Servîsanê lezabezan de personelê ke bi kirdkî xizmet danê estê? Eke estê hûmara înan çendek a?

-Şima seba ke nêweşxaneyan de bi ziwanê dayîke xizmet bêro dayene gamêke bierzê?