Hemserekê Pêroyî yê DEM Partî Tuncer Bakirhanî merasîmê yadkerdişê qurbananê Qirkerdişê Garî de qisey kerd û pare kerd ke êyê ke DAÎŞî reyde kenê ke sîyasetî dîzayn bikerê qetî do bêrê muhakemekerdene.
DEM Partî vera biranê Dewaya Kumpasî ya Kobanê cayanê hêrişanê DAÎŞî de çalakîyan kena.
Ewro zî verê Garê Anqara de qurbanê Qirkerdişê 10ê Teşrîna Verêne ya 2015î ameyî yadkerdene. Merasîm de pankarta ''Kobanê ra nata ma vera barbarîya DAÎŞî merdimatîye pawenê'' ameye akerdene û sloganê ''Kobanê do bin nêkewa'' ame vatene.
Hemserekê Pêroyî yê DEM Partî Tuncer Bakirhanî merasîm de qisey kerd.
Bakirhanî vist vîrî ke êyê ke Garê Anqara de ameyê qirkerdene vera barbarîya DAÎŞî ameybî pêser û vat: ''Mabênê 7ê hezîrane û 1ê teşrîna peyêne de DAÎŞî Gar, Amed, Pirsûs, Dîlok, Reyhanli de bi asanî û eşkerayî qirkerdişî kerdî. Vera nê qirkerdişan tedbîrî nêameyê girewtene. Teyna qirkerî ney êyê ke verê nînan de bêveng mendê zî do bêrê muhakemekerdene. Çira nê terorîstan rê qetî mudaxele nêame kerdene?
Êyê ke weçînayîşanê 7ê hezîrane de bin kewtbî, xîret kenê ke DAÎŞî reyde sîyasetî dîzayn bikerê. Qirkerdişanê DAÎŞî îqtîdarî rê fayde kerd. Ewro qirkerî û sûcdarî ney sîyasetmedarê kurdî yenê cezakerdene. Birê Dewaya Kobanê seba ma pûç ê. Êyê ke DAÎŞî reyde kenê ke sîyasetî dîzayn bikerê qetî do bêrê muhakemekerdene.
Muhakemekerdişê kurdan, sosyalîstan û muxalîfan qetî fayde nêkerd û do nêkerê. Seba ke meseleya kurdan nêna çareserkerdene Tirkîya bîya wareyê çeteyan. Ganî ma seba demokrasî tim têkoşîn bikerê û hesabê qirkerdişan bipersê.''
