Hemserekê Pêroyî yê DEM Partî Tuncer Bakirhanî vizêr çarçewa xebatanê weçînayîşî de qezayê Sancaktepe û Şîşlî zîyaret kerdî. 

Bakirhanî namzedanê Şaredarîya Îstanbulî Murat Çepnî û Merale Daniş Beştaş reyde hêverî Sancaktepe de esnafî zîyaret kerdî û goş na meseleyanê şarî ser. 

Dima Bakirhan tewrê kombîyayîşê şarî bi.

Bakirhan Çepnî û Beştaşe reyde Sancaktepe ra derbazê qezaya Şîşlî bi. Heyet salonêke de tewrê kombîyayîşê şarî bi. Şarî bi coşî û slogananê sey Bijî Serok Apo” û “Bijî berxwedana zindanan” Bakirhan pêşwazî kerd.

Kombîyayîş de Merale Daniş Beştaş îfade kerd ke Îstanbul şaristanê kurda o tewr pîl o. Beştaşe pare kerd ke ê do şaredarîya Îstanbulî bikerê şaredarîya cinîyan.

Dima Tuncer Bakirhanî xîtabê şarî kerd û vat: ''Mîyanê partîya ma de elewîyan ra bigêrê heta sûryanîyan û lazan pêro nasnameyî yenê temsîlkerdene. Partîya ma sey Îstanbulî ya. Îstanbul zî DEM Partî ya. Ewro şarê kurdî hema zî çin hesibîyeno. AKP ziwanê ma înkar keno la deyîra embazê ma ya bi kurdkî bêdestûr seba di-hîrê rayan şuxilneno. Ganî hinî no sîyaseto rîyaker biqedo. Partîya ke do Îstanbulî rê xizmetanê tewr holan bikera ma yê. Ma bi xo bawer ê, ma do Îstanbul de binê îdareyê embazanê xo de şaristanî newe ra awan bikerê.''