Xebatê weçînîyaşî yê Partîya Demokrasîyî û Têdûştîye ya Şaran (DEM Partî) bi coşî dewam kena. DEM Partî ewro  bi tewrbîyayîşê bi hezaran kesan ewro Îdirî de mîtîng kerd.

Mîtîng de hêverî Namzeda Şaredarîya Îdirî ya DEM Partî Nejla Kum qisey kerd û vat: ''Ma do rayîr nêdê ke çeteyî îradeyê ma xesp bikerê. Ma do şaristanê xo çeteyan ra bixelisnê.''

Hemserekê DEM Partî Tuncer Bakirhanî zî mîtîng de xîtabê şarî kerd û vat: ''Înan Newroze de dî ke ma est ê û do est bê. Îqtîdarê AKPyî nê 22 serran de welatê ma û Îdir de krîzo ekonomîk viraşt. Ganî 31ê adare de ma cewabêkê rindî bidê nînan. AKPyî Îdir de ne zîret ne heywankarîye ne zî citkarê verdayo. 

Erdoganî vato 'Wa DEM Partî xo îsbat bikera.' Îsbatê ma meydanê Newroze yê. Eke şima biewnê ê meydanan ra şima îradeyê kurdan do bivînê. Eke Erdogan nê ziwanê şerî biterikno, budçeya şarî bido şarî, mabênê komelî de cîyakerîye mekero, ziwanê kurdan rê nêvajo ziwanêko xerîb û tecrîdê Îmraliyî wedarno ti do muxatabî bivînî. O çax ma yenê yewca qisey kenê. 

Qeyûmî qetî xizmetê şarê ma nêkenê. Ma do şaristananê xo nînan ra apey bigêrê. Ma do 31ê adare de û verê ci vera hîleyan zî wayîrê rayan û sindoqanê xo vejîyê. Ma do îtîfaqê JÎTEMî asteng bikerê. Ganî kurdî yew bibê û peyê hesabanê qijan war verdê.''

Bakirhanî ra dima hunermend Azad Bedran vejîya sehne ser û mîtîngî bi govendan dewam kerd.