Hemserekê HEDEPî Tuncer Bakirhanî Îdir zîyaret kerd û bi coşî ame pêşwazîkerdene.

Bakirhanî merkezê şaristanî de qisey kerd.

Bakirhanî bale ante meseleya kurdan ser û vat: ''Erdogan vano ke tarîxê komara Tirkîya pur û pak o. La eqsê qiseyê Erdoganî tarîxê Tirkîya bi qirkerdişan dekerde yo. Tirkîya de meseleyê pîlî est ê û bingeyê nînan de zî meseleya kurdan est a. Rejîmê Erdoganî dişmenê kurdan o û teyna tîya de ney Rojawan û Başûr de zî hêrişê kurdan keno. Eke Tirkîya dişmenîya vera kurdan ra fek vera bida do aver şora.

Erdoganî verî vatbi ke modelê 50+1 seba îdareyê welatî modelo teqr maqûl o. La nika zî vano ke ganî nê modelî ra fek vera bêro dayene. Beno ke mabênê nînan û şîrikê ci Bahçelîyî de meseleyî est ê. Ma do bivînê. Seba îdareyê welatan modelo tewr raşt modelê Rojawanî yo. Nê modelî de edalet, têdûştîye û demokrasî est ê. Ma Rojawanî bi na wesîle selam kenê. Ma do Îdîrî ra dest pêbikerê û rejîmê qeyûman bişawê.

Tirkîya de tecrîdêko mutleq est o. Birêz Abdullah Ocalanî ra hîrê serrî yo xeberêke zî nêna girewtene. Birêz Ocalanî tim seba haştîye xîret kerd. Îqtîdar zî ney zaneno. Seba çareserîya meseleya kurdan adres Îmrali yo. Eke şima Birêz Ocalanî de ronişê û qisey bikerê eşkenê meseleya kurdan çareser bikerê. Seba ney zî ganî tecrîdê Îmraliyî bêro wedaritene.''

Bakirhanî dima esnafî zîyaret kerdî.