Wan de amebi xîretkerdene ke mazbataya namzedê DEM Partî Abdullah Zeydanî bêra xespkerdene. Hemserekê Pêroyî yê DEM Partî Tuncer Bakirhanî ANFyî rê serkewtişê xoverdayîşê Wanî ercna.

Bakirhanî pare kerd ke şarê kurdî bi xoverdayîşê xo cewab da mezgê qeyûmî û vat: ''Xoverdayîşê Wanî pêro şaristanan rê bi nimûne. Rayaumûmîye û şarê Tirkîya wayîrê îradeyê Wanî vejîyayî ke no paştdayîş vera neheqîya serê îradeyê Wanî nêrazîbîyayîş bi. Seba wayîrvejîyayîşê xoverdayîşê Wanî îtîfaqê 86 mîlyon merdiman est bi. Bi xoverdayîş û paştdayîşî ma do nêverdê şaristanê bînî bêrê xespkerdene. Xoverdayîş, têkoşîn û paştdayîşî Wan de ser kewtî. Nimûneya Wanî safhayêka newîye zî daye destpêkerdene.''

Bakirhanî îfade kerd ke têkoşîn do dewam bikero û ê do xîretê xespkerdişê îradeyê Bedlîs û Wanî zî têbigêrê. Bakirhanî vat: ''Têkoşîn û îtîrazê ma dewam kenê. Bedlîs de 2 hezar rayê betalî ameyê hesibnayene. Curnê Reşî û Xelfetî de weçînayîşî ameyî betalkerdene. Ma do derheqê nê şaristanan de bixebitê. Bi xoverdayîş û paştdayîşî ma do îradeyê şarê xo apey bigêrê.''

Bakirhanî dîyar kerd ke netîceyê weçînayîşanê herêmîyan nîşaneyê destpêkê rijîyayîşê îqtîdarî yê û vat: ''Bindest, karker, kedkarî hinî nêwazenê wina biciwîyê. Weçînayîşan de nînan îradeyê xo mojna û vat ke sîyaset û muxalefetêko hol eşkenê Tirkîya demokratîk bikerê. Coka nê serkewtişê weçînayîşan ê partîyan ney ê şarî yo. Ma kewtê prosesêkê winayênî ke şar mîyanê sîyasetî de cagêno.''