HDPyî 2021 de raştê hêrişan ame, vera ci dewaya qefilnayîşî ameye akerdene, endamê ci ameyî qetilkerdene, dest nîya parlamenterîya wekîlanê ci û xeylêk endamê ci ameyî destbendkerdene. HDPyî cewab da nê hêrişan û rêxistinîya xo xurtêr kerde.

HDPyî 2021 de nêzdîyê 500 mîtîngî kerdî. Hetkarê Hemserekanê HDPyî Tuncer Bakirhanî serra 2021î hetê HDPyî ra ercnaye. 

Bakirhanî vist vîrî ke bi serran o polîtîkaya teda ya dewlete vera HDPyî yena ferzkerdene, kişîyayîşê Denîze Poyraz serebûto verên ê kiştişî nîyo û vat: ''Hemserek û hemşaredarî zî tede bi hezaran endam û îdarekarê HDPyî tepişte yê. Qersî ra heta Edîrne bi mîlyonan merdiman tim paştî daye HDPyî. No zî moral dano ma.

Meclîsê Cinîyan ê HDPyî 8ê adare de waran de bi, rayberîya Meclîsê Cinîyan de çalakîyê 'Xizanîya cinîyan rê nê' kerdî, cinîyan ê kedkaran de ameyî yewca. 2021 de têkoşînê ma yê vera şîdetê serê cinîyan astêka bîne de xurtêr bi. HDPyî rayberîya nê têkoşînî kerde. Newroze emser bi şîarê 'Ma estbîyî, estê, do estbê' bi beşdarîya mîlyonan ameye fîrazkerdene. Wayîrvejîyayîşê şarî xoverdayîşê ma kerd xurtêr. Ma qe rardar, xoverdayox û têkoşer ê. Seba servistişê têkoşînî doman û kokimî zî tede şarê ma her tewirê zehmetî û zorî girewt verê çimanê xo. Newroza 2021î de ma reyna no mojna.

21ê adare de ma Kampanyaya 'Semedê her kesî edalet' daye destpêkerdene û 70 şaristanan û qezayan de şarî reyde ameyî yewca. Ma 2021 500 kombîyayîşê şarî û mîtîngî kerdî. Şarê ma nê cayan de cewab da polîtîka tasfîyekerdişî. Ma çarçewa Kampanyaya 'Ma HDPyî yê, her ca de yê' de 71 şaristanan de xo resna merdiman û 500 hezar keyeyan. Ma 10 hezar dewî zîyaret kerdî. Çarçewa 'Pêvînayîşanê Nan û Karî' de ma hewt herêmanê Tirkîya de esnafî, merdimê xizanî, berardox û citkarî zîyaret kerdî û goş na meseleyanê înan ser.''

Bakirhanî ard ziwan ke înan êlula 2021î de karêko zaf girîng seba şaranê Tirkîya û demokrasî kerd û vat: ''No 'Dokumentê Tewirî' bi ke 11 madeyan ra ameyêne war û nê dokumentî pêşnîyazê ma yê çareserîya meseleyanê Tirkîya vistî verê çiman. Çarçewa 'Dokumentê Tewirî' de ma xeylêk cayî zîyaret kerdî û pêşnîyazê xo pêşkêş kerdî. Şarî eleqeyêko pîl mojna ma.

Rixmê teda, tepiştiş, dewaya qefilnayîşî û hêrişanê nîjadperestan zî ê nêeşkayî verê HDPyî bigêrê. Ma tim hêvîdar bîyî. Ma 2021 de bawerîya kurdan, kedkaran û merdimanê bindestan bêcewab nêverdaye.''

Bakirhanî bale ante dewaya qefilnayîşê HDPyî ser û vat: ''HDP partîya ma ya 12. Heta nika zaf partîyê ma ameyî qefilnayene. Ma ronayîşê her partîye de hîna bîyî xurtêr û pîlêr. Qefilnayîşê partîya ma netîceya hesabanê sîyasîyan o, çareserîye rê xizmet nêkeno. Dewaya Kobanê de zî tewirê partîya ma zelal o. Ma tim cewab da na hişmendîya kahanwaze. Eke ê muhakemekerdişêkê normalî bikerê pêro embazê ma na dewa de do berat bikerê. Embazê ma hê salonanê roniştişî de pê pawitişanê xo dersanê tarîxî û huqûqîyan danê. Ma pêro kayanê înan 2022 de do pûç bikerê. Serra 2022î do biba wisarê şaranê ma.''