Tecrîdê serê Rayberê Şarê Kurdî Abdullah Ocalanî bado ke Buroyê Huqûqî yê Asrinî da pêhesnayene ke CPTyo ke şîyo Îmrali Ocalanî reyde pêvînayîş nêkerdo, reyna bi rojdem. Naye ser o 107 avûkatan muracatê Baroyê Amedî kerd ke wa waştişê pêvînayîşê Ocalanî biresnê Wezîrîya Edaletî û Yewîya Baroyanê Tirkîya. Baroyê Amedî muracatê nê wird dezgehan kerd.Endamê Heyetê Rayberdişî yê Baroyê Amedî Aydin Ozdemîrî ke derheqê babete de ANFyî rê qisey kerd.

Avûkat Aydin Ozdemîrî nê vatî: “Embazanê ma muracatê ma kerd û waşt ke semedê pêvînayîşê Abdullah Ocalanî ma muracatê Wezîrîya Edaletî û Yewîya Baroyanê Tirkîya bikero. Ma zî badê  kombîyayîşê heyetê îdareyî qerar girewt û 14ê kanûne de muracatê nê wird dezgehan kerd. Ma muracatê xo yê nuştekîyî de ard ziwan ke tecrîd qey goreyê huqûqî nîyo vat ganî hinda ê rolêk bîgêrê. Wezîrîya Edaletî leteyêka hukmatîya la Yewîya Baroyanê Tirkîya  yew rêxitina huqûqî ya û ganî mîsyonê xo bîyaro ca. Yew tecrîd est o û avûkatî nêeşkenê çîyêk bikerê. Coka tîya wezîfeyê baroyan est o. Baroyî goreyê qanûnê avûkatan ganî huqûqî bipawê. Ma maxdûrîyetê embazanê xo dî û na babete di muracatî kerdî û ma do nînan teqîp bikerê.

Tirkîya Pêkerdişê Heqanê Merdiman ê Ewropa û xeylêk pêkerdişê bînî yê mîyanneteweyîyî îmza kedî. Ganî goreyê nê pêkerdişan têbigêro. Nêbo ganî Mehkemeya Heqanê Merdiman a Ewropa(MHME) û Konseya Ewropa Tirkîya pêkerdişî ra vejo. La Ewropa goreyê sîyasetî têgêrena, coka goreyê menfeatê xo qeraran gena. Fîkrê mi yo şexsî oyo ke Ewropa wazena dewêkê bînî bi Erdoganî bixebito. Coka prosedurunê xo nêana ca. MHME derheqê tecrîdê serê Abdullah Ocalanî de qerar girewt ke binpaykerdişê heqan est o. La Tirkîya badê nê qerarî waştişê MHME nêardî ca. Coka ganî pêkerdişî ra bêro vetene la çîyo winayên nêame kerdene.”