Ronayoxanê PKKyî ra Sakîne Cansiz (Sara), Temsîlkara KNKyî ya Parisî Fîdane Dogan (Rojbîne) û Endama Têgêrayîşê Ciwanîye Leyla Şaylemez (Ronahî) ê ke Paris de ameybî qetilkerdene, serrgêra 8. ya qirkerdişî de Dêrsim, Mereş, Mersin, Colemêrg  û xeylêk bajaranê Kurdîstan û Tirkîya de ameyî vîrardene.

Dêrsim

Dêrsim de vêrî ke rêxistina HDPyî serê gorê Sakîne Cansiz de merasîmê vîrardişî bikero, polîsan goristan girewt binê ablûqa. Polîsan destur nêda grûba ke wekîlî Meral Daniş Beştaş, Ayşe Acar Başaran, Semra Guzel, Remzîye Tosun û aktîvîstê TJA tede bî, bikewo goristan. Nayî ser o vîrdaiş banê HDPyî de ame kerdene. Başarana ke vîrardiş de qisey kerd vat: ''Pêro dinya zana ke kamî qirkerdiş kerd. qetilkerdişê înan nêvejeno nêverdenê ma serê gorê ci mum tafînê. No îqtîdar mucadeleyê sakîneyan ra terseno. Destûr nêdanê ke ma şirê gorê Sakîne Cansiz ser ke mucadeleyê ci hema dêsanê zîndanê Amedî ra zimeno. Mucadeleyê aye Dêrsim û Kurdîstan de hema dewam keno. Sakîne Cansiz tu kerd rîyê celandan ro. Ma zî hemrayê aye yê ma do verê zextî de çok nêdê rêça şehîdan têkoşînî pîlêr bikerê.''

Mereş

Fîdan Dogane zî taxa Xoponî yê qezaya Elbîstanî ya Mereşî de serê gorê ci de ameye vîrardene. Wekîla HDPyî ya Riha Ayşe Suru, Mayê Haştîya û îdarekarê HDPyî yê bajarî tewrê vîrardişî bîyî. Verê vîrardişî polîsan taxe û goristan girewtî binê ablûqa. Vîrardişo ke cinîyî pê şalanê moran tewrê ci bîyî polîsan pê dronayan qey kerd. Ayşe Surucuya ke vîrardiş de qisey kerd vat: ''Verê çimanê heme dinya de hîrê cinîyê şorişgêrî mabênê Paris de ameyî qetilkerdene û heta ewro qetilkarî nêameyî cazekerdene. Ma do peynîya nayî cameverdê û rêça înan de têkoşîn bikerê.''

Mersin

Leyla Şaylemez zî Goristanê Guneykentî yê qezaya Toroslarî ya Mersinî de serê gorê ci de ameyî vîrardene. Wekîla HDPyî ya Adana Tulaye Hatimogullari, îdarekarê HDPyî yê Adana û Mersinî û xeylêk kesî tewrê merasîmî bîyî. Hatimogullari vîst vîrî ke demo ke semedê çareserîya meseleya kurdî gamî ameyêne eştene hîrê cinîyê şorişgêrê kurdî Paris de ameyî qetilkerdene û vat: ''Ma şexsê nê hîrê şehîdanê xo de heme şehîdanê xo bihurmet yad kenê û sozê pîlkeridşê têkoşînî danê.''

Reyna Colemêrg û Anqara de zî hetê rêxistinanê HDPyî ra hîrê cinîyê şorişgêrî Sara, Rojbîne û Ronahî ameyî yadkerdene.