Vervatoxa Meclîsê Cinîyan ê HDPyî Ayşe Acar Başaran bînaya merkezî ya partîya xo de kombîyayîşê çapemenîye de qisey kerd. Qiseykerdişê Başarane ra beşêk wina yo:

''Ewro roniştişê dewaya qirkerdişê Konya esto. Hêrişê vera kurdan hêrişê normalî nîyê. Kiştoxî tepişte yê la îqtîdaro ke plansazîya nê hêrişan kerdo polîtîkayanê xo yê nefretî rê dewam keno. Îqtîdar bi xo mesuldarê nê qirkerdişî yo.

Rejîmê tecrîdî yo ke Îmrali de dîyabi destpêkerdene pêro komelî ra vila beno. No tecrîd vera tepişteyan tedayanê pîlan ano ca, vera înan hêrişê pîlî estê. Rewşa tepişteyanê nêweşan zî her roje bena giranêr. Tehlîyeyê nê tepişteyan yenê astengkerdene, tepişteyî îşkence vînenê. Aysele Tugluk roje bi roje bena xirabêr. Rixmo ke Zanîngehê Kocaelî ci rê raporê 'nêeşkena zîndan de bimana' dayo Dezgehê Tipê Edlî pê raporê xo nêverda ke a serbest biba. Hemsereka ma ya Mûşî Muhlîse Karaguzel (60)a ke tede xeylêk nêweşîyê giranî estê vera nêdîyena.

Zîndanê Kandira de cinîyanê ke qetilkerdişê Garîbe Gezer protesto kerd, cezaya dîsîplînî dîyaya înan. Gardîyanan Leyla Guven rê gef wendo. Çira derheqê nê gardîyanan de tehqîqat nêno kerdene? Eke reyna zîndan de çîyêk bêro embazanê ma sereyî mesuldar Wezîrîya Edaletî û Îqtîdar o.

2021 de 307 cinîyî ameyî qetilkerdene , 217 cinîyî bi hawayêkê şikdarî merdî. 7ê çeleyê 2022î ra heta ewroyî 7 cinîyî ameyî qetilkerdene. Nika zî krîzo ekonomîk esto. Ma verî zî vatbi no krîz tewr zaf tesîrê cinîyan keno. Cinîyî ver bi vêşanîye şinê. Seba ke ped û tamponî bi vaya zêde roşîyenê no tesîrê weşîya cinîyan keno. Ma do vera ney têkoşîn bikerê. Ma venga Wezîrîya Keyeyî danê ke cinîyî nêeşkenê malzemeyê hîjyenî bikerê û ganî no çi rojdem de bibo. Ganî weşîye û ameyoxê cinîyan rojdem de bibo.''